ҚР БҒМ 2014 жылы инклюзивті білім беру тұжырымдамасын дайындайды – А.Сәрінжіпов

«Мәселе өте маңызды, биыл инклюзивті білім беру тұжырымдамасын дайындауды күн тәртібіне қойып отырмыз. Осы мақсатта талқыланатын екі бағыт айқындалды. Біріншісі: білім беруді дамытудың мемлекеттік бағдарламасы арқылы инклюзивті білім беруді енгізу мен дамыту қолға алынса, екіншіден, тұжырымдаманы іске асыруға бағытталатын шаралардың нақты жоспары қабылданбақ», - дейді еліміздің бас ұстазы.

Ведомствоның мәліметінше, жалпы, республика бойынша он сегіз жасқа дейінгі 138 513 мүмкіндігі шектеулі бала бар. Бұл барлық балалардың 2,8%-ын құрайды.

Сонымен қатар, арнайы мамандандырылған оқыту бағдарламасы бойынша 62130 оқушы білім алуда, ал арнайы мектепке дейінгі бағдарламада2 7406 бүлдіршін қамтылған.

Мемлекеттік бағдарлама аясында үйден білім алатын 6335 мүмкіндігі шектеулі бала республикалық бюджет есебінен компьютер мен өзге де техникамен қамтамасыз етілген.

Қазіргі таңда Қазақстанда еліміздегі мүмкіндігі шектеулі балаларға түзету-педагогикалық қызмет көрсететін 17 бейімдеу орталығы, 133 психолого-педагогикалық кабинеті, 558 логопедтік пункт жұмыс істейді.

Министрліктің мәліметінше, бүгінде еліміздегі мүмкіндігі шектеулі балалардың саны өте төмен деңгейде. Атап айтар болсақ бұл көрсеткіш 2,8% құрайды. Ал әлемдік деңгейде бұл көрсеткіштің  7-10% аралығында екені белгілі.