«Даму» қорының әрбір төртінші жобасын әйелдер жүзеге асырады – Л.Ибрагимова

11 Наурыз, 2014 12:50

Бүгін ҚР Президенті жанындағы Орталық коммуникациялар қызметінің брифингінде «Даму» Кәсіпкерлікті қолдау қоры» АҚ басқарма төрағасы Ләззат Идрагимова «Даму» қорының әрбір төртінші жобасын әйелдердің іске асыратынын айтты.

«Даму» бағдарламаларына қазақстандық әйел кәсіпкерлердің қатысу статистикасы туралы айтар болсақ, қаржыландыру жағынан әрбір төртінші жобаны әйелдер қолға алады», - дейді басқарма төрағасы.

Оның айтуынша, кәсіпкерлер арасында кепілдік қамтамасыз етудің жетіспеушілігі кезіндегі кепілдеме құралы үлкен сұранысқа ие.

«Біз кәсіпкерлердің алғашқы несиесінен 70%-ға дейін кепілдендіреміз. Ал алғашқы несиенің ең көп мөлшері 20 млн теңгені құрайды. Біз әйелдердің кәсіпкерлікте кеңінен араласуына жағдай жасаймыз. Олар аз ғана несие алып, артынша субсидия түріндегі мемлекеттік көмекке ие болып, кейін екінші рет қаражатқа қол жеткізе алады», - дейді Л.Ибрагимова.

Кепілдендіру тұрғысынан әрбір үшінші жобаны әйелдер іске асырып отыр.

Сонымен қатар, оның айтуынша, «Даму» қоры кәсіпкерлер әйелдердің біліктілігін арттыру мен оқытуға баса назар аударады.