Қазақстандық делегация Берлиндегі Жібек жолы елдерінің туризм министрлері кездесуіне қатысты

Туризм индустриясы комитетінің хабарлауынша, «ITB Берлин» халықаралық туристік көрмесіндегі кездесудің басты тақырыбы визалық тәртіпті жеңілдету мәселесі болды.  

Кездесуге қатысушылардың айтуынша, күрделі визалық жүйе, визаға өтініш берудің тиімсіз процедурасы мен бағасының қымбаттылығы Жібек жолының дамуына кедергісін келтіріп отыр.

Кездесуді аша отырып, ЮНВТО бас хатшысы Талеб Рифаи «Жібек жолы мұрасының дәлізі жобасы» Қазақстан мен өзге де қатысушы елдерге туризмді өздерінің бай табиғаты мен мәдениеттерін сақтай отырып дамытуға және насихаттауға мүмкіндік беретінін айтты.  

Өз кезегінде ҚР ИЖТМ Туризм индустриясы комитеті өкілі Марат Иғалиев Қазақстан Астанада ЭКСПО-2017 көрмесін өткізу аясында визалық тәртіпті жеңілдету жұмыстарын жүргізіп жатқанын айтты.

Оның айтуынша, алдағы уақытта 40 шақты елммен визалық тәртіпті қарапайымдату мәселесін қолға алу жоспарланған. Осылай ҚР ИЖТМ Туризм индустриясы комитеті ҚР ІІМ-мен біріге отырып Астана қонақүйлерінде шет елдік туристерді тұрғын жайлары бойынша тіркейтін қанатқақты жоба дайындайды.

Келіссөздер барысында қазақстандық делегация ЮНЕСКО, ЮНВТО және Гидтердің дүниежүзілік қауымдастығы жетекшілерімен Алматыда Жебек жолы бойынша гидтерді дайындау бойынша тренинг өткізуге келісті.

Сонымен қатар Жібек жолы бойынша мамандандырылған гидтерді дайындайтын арнайы оқу құралы дайындалмақ.