Астанада елорданың дамуына үлес қосқан әйелдер жайлы альманахтың тұсаукесері өтеді

Альманах 9 бөлімнен тұрады: «Тарих пен қазіргі заман», «Астана әйелдері: XXI ғасыр», «Даңқ галереясы», «Үкімет адамдары», «Елорда мақтанышы», «Табысты әйел», «Әйел-ана», «Жансерігім, жолдасым, жұлдызым», «Астана үміті».

Ұлттық академиялық кітапханада хабарлағандай, тұсаукесерге іргесі енді қаланған бас қаламыздың қалыптасуы мен көркеюіне ерен үлес қосқан альманах кейіпкерлері – депутаттар, бизнесмендер, әртүрлі сала өкілдері мен мамандық иелері – ҚР Парламент Мәжілісінің депутаттары Әсима Бимендина, Майра Айсина, Оразгүл Асанғазы, Қазақстан іскер әйелдері ассоциациясының президенті Раушан Сарсембаева, «Selebrite – SPA» фитнес орталығының директоры Динара Сардарова, құрылыс корпорациясының директоры Г.С. Ибрагимбаева қатысады.

Тұсаукесерге арнайы «Әйел – әлем, әйел – өмір, әйел – жыр» атты кітап көрмесі қойылады. Сондай-ақ, меймандардың назарына ұлттық кәдесыйлар мен зергерлік бұйымдар өндіретін «ӘДЕМІ-АЙ» компаниясының әшекей заттар көрмесі ұсынылады.