Миланда «Алуан түрліліктегі тұтастық. Бүгінгі Қазақстанның этникалық топтары, діндері мен мәдениеттері» монографиясының тұсаукесері өтті

5 Наурыз, 2014 11:00

Леонардо да Винчидің қолжазбалары, суреттері мен сызбалары сақталған атақты "Амброзиана" кітапханасы залдарының бірінде ҚР Елшілігі итальяндық ISAG Геосаясат және сабақтас пәндердің жоғарғы мектебі институтымен бірлесіп, «Алуан түрліліктегі тұтастық. Бүгінгі Қазақстанның этникалық топтары, діндері мен мәдениеттері» монографиясының тұсаукесеріне арналған дөңгелек үстел өткізді. Аталған монографияны «Еуразия» бағдарламасы шеңберінде ISAG институтының сарапшылары мен ғылыми қызметкерлері әзірледі.

ҚР Сыртқы істер министрлігінде хабарлағандай, басылымда дінаралық диалог мәселелері және Қазақстанның осы саладағы саясаты жөніндегі мақалалар, сұхбаттар және аналитикалық материалдар, ҚР Президенті Н.Назарбаевтың Әлемдік және дәстүрлі дін көшбасшыларының 3-съезінде сөйлеген сөзі, сондай-ақ Қазақстанның ұлттық бірлігі доктринасы мен «Қазақстан халқының ассамблеясы туралы» Қазақстан Республикасының Заңы сияқты құжаттар қамтылған.

Аталған шараға дін саласындағы Италияның жетекші сарапшылары, қоғамдық қайраткерлер, мәдениет және ғылым қайраткерлері, миландық университеттердің профессорлары мен оқытушылары қатысты.

Қазақстанның Италиядағы Елшісі А.Елемесов өзінің сөйлеген сөзінде итальяндық қауымды тәуелсіз Қазақстан жағдайында саяси мәдениеттің нормасы болып қана қоймай, сонымен қатар мемлекеттік саясаттың негізгі қағидасына айналған дінаралық толеранттылықтың қазақстандық үлгісінің ерекшеліктерімен таныстырып өтті. Қазақстан халқы ассамблеясының белсенді қызметі мен ғаламдық конфессияаралық келісімді нығайтуға себеп болып отырған бірегей халықаралық форум болып табылатын Әлемдік және дәстүрлі дін көшбасшыларының төрт съезінің өткізілуі осыған дәлел.

20 жылдан астам уақыт Қазақстанда тұрған, ал қазір «Амброзиана» кітапханасының ғылыми қызметкері болып табылатын миландық профессор және католик дін қызметшісі Эдуардо Канетта тыңдаушылармен Қазақстандағы жинаған өзінің жұмыс тәжірибесімен бөлісті. Ол сондай-ақ Қазақстандағы Католик шіркеуінің мемлекеттегі конфессияаралық келісімді сақтау ісіне белсене қатысып отыратынын және өзінің дәстүрлі бітімгершілік және ағартушылық миссиясын белсене өткізуі үшін онда барлық мүмкіндіктердің бар екеніне назар аударды.

Итальяндық тарап өкілдері Қазақстанның осы саладағы саясаты әлемнің қызығушылығын тудырып, оның қорытындылары тек діни жетекшілер арасында емес, сонымен қатар әртүрлі елдердің саяси, мемлекеттік элитасында да үлкен резонанс тудырып отырғандығын атап өтті.

Барлық жаңалықтар