ЭКСПО-2017 нысанының ешбірі бос қалмайды – Н.Қаппаров

«Біз архитекторлармен сөйлескенде, ең бастысы көрме нысандарының көрмеден кейін де пайдалану мүмкіндігін басты назарда ұстадық. Салынған нысандар Астананның сәулетіне сәулет қосып ел игілігіне қызмет етуі керек. Мен өз басым көптеген елдердегі ЭКСПО көрмелерін араладым. Ол жақтарда да көрме нысандары жақсы жолға қойылған», - деді министр.

Оның айтуынша, ЭКСПО нысандарын көрмеден кейін де пайдалану жобаның басты талабы мен міндеттемесі болуы керек.

«Архитекторлар нысандарды тұрғын үй ретінде сату, халықаралық павильондарды кеңсеге айналдырып, қала үшін қосымша табыс әкелетін ғылыми-техникалық хайтек кластерлер ретінде қолдану жағын қарастырды», - деді ведомство басшысы.

Қазірдің өзінде мамандар барлық нысандарды көрмеден кейінгі пайдалану жағына қарай ыңғайлауда.

«Нысандардың барлығын көрмеден кейін қалай пайдалану керектігін біз ойластырып қойдық. Ешбір ғимарат бос қалмайды. Әрқайсысы қаланың игілігіне қызмет ететін болады. Көрме шараларынан кейін де аталмыш нысандарға шет елдік қонақтар келіп тамашалануына жағдай жасалады», - деді министр.