Афинада ҚР Президенті Н.Ә.Назарбаевтың Жолдауы таныстырылды

3 Наурыз, 2014 15:00

Афинаның Каподистрия атындағы ұлттық университетінде Қазақстан Республикасының Президенті Н.Ә.Назарбаевтың «Қазақстан жолы - 2050: Бір мақсат, бір мүдде, бір болашақ» атты жолдауымен таныстыру рәсімі болып өтті.

Аталған шараға «Қазақстан-Грекия» парламенттік тобының мүшелері, ғылыми-зерттеу топтары, БАҚ өкілдері, аталған білім ошағының профессорлық-оқытушылар құрамы мен студенттері қатысты, деп ҚР Сыртқы істер министрлігінде хабарлады.

Елшілік жиналған тыңдармандарға қазіргі Қазақстанның жетістіктері туралы ақпарат бере отырып, еліміздің 2050 жылға дейінгі дамуының стратегиялық бағыттарын жүзеге асырудағы Елбасының алға қойған міндеттерін түсіндірді. Тыңдармандарға Жолдаудың грек тілінде басылған кітабы ұсынылды.

Грек парламентінің депутаты Вирон Полидорастың пікірінше, Қазақстан Республикасының Президенті Н.Ә.Назарбаевтың биылғы жолдауы - «Қазақстан-2050» стратегиясын жүзеге асыру үшін дер кезінде қабылданған құжат. Ол Қазақстанның жарқын болашағы үшін маңызды саяси бағдар болып табылады.

Грек студенттері жолдаудағы «мәңгілік ел» идеясына қызығушылық білдіріп, Қазақстанның бірлігін нығайтудағы маңыздылығын атап өтті.