Н.Нығматуллин мен Э. Хейнялуома қазақстандық-финдік парламентаралық ынтымақтастығын талқылады
Мәжілісте хабарлағандай, тараптар Қазақстан мен Финляндия маңызды сыртқы саяси және экономикалық әріптес екенін, мемлекет басшыларының араларындағы байланыстың қарқыны екіжақты қарым-қатынастарды әрі қарай дамыта түсуге негіз болып отырғанын атап көрсетті.
«Біздің елдеріміздің «Жасыл көпір» бағдарламасы аясындағы ынтымақтастығы «жасыл» технологиялар саласындағы өзара іс-қимылдардың сындарлы үлгісі бола алады. Финдік әріптестер қазақстандық бастамаға қолдау көрсетіп, «Жасыл көпір» әріптестік бағдарламасы туралы Хартияға қосылады деген үміттеміз», - деді Мәжіліс Төрағасы өз сөзінде.
Инновация, «жасыл экономика», білім салалары мен сондай-ақ БҰҰ, ЕҚЫҰ, Еуропа Кеңесі және басқа да халықаралық бірлестіктер мен ұйымдардың аясындағы белсенді өзара іс-қимылдар - ынтымақтастықтың басымдықты бағыттар болып табылады.
Ээро Хейнялуома өз кезегінде, Қазақстанның өңірдегі және әлемдік сахнадағы роліне жоғары баға берді және біздің еліміздің жетістіктері мен орнықты дамуы дүниежүзі елдеріне үлгі болып табылатынын айтты.
Бейбітшілікті, тұрақтылық пен қауіпсіздікті нығайтудағы Қазақстанның үлесіне тоқталған Нұрлан Нығматуллин сондай-ақ, біздің еліміздің халықаралық қоғамдастықтағы жоғары деңгейлі жауапкершілігін паш етіп отырған Президент Нұрсұлтан Назарбаевтың барлық антиядролық бастамаларының маңыздылығын атап көрсетті.
«Қазақстан қауіпсіздік мәселелері жөніндегі Еуроодақ-Орталық Азия Жоғары деңгейлі диалогын құру туралы Еуроодақтың бастамасына қолдап отыр және оны дамыту үшін қолынан келген көмекті көрсетуге дайын»,- деді Нұрлан Нығматуллин өз сөзінде.
Спикер сондай-ақ, Хелькинкиде өткізу жоспарланып отырған Таяу Шығыста ядролық қарудан және жаппай қырып-жоятын қару-жарақтан таза аумақ құру мәселесі жөніндегі халықаралық конференцияға Қазақстан парламентшілерінің қатысуға әзір екенін жеткізді.
Нұрлан Нығматулиннің айтуынша, Қазақстанның діттеп отырған басымдықтарының бірі Еуропалық құқықтық кеңістікке қосылу болып табылады.Осыған орай, екі елдің спикерлері парламентаралық қатынастар мәселелеріне де айрықша тоқталып өтті.
