Үкіметте рұқсаттамалық жүйені жетілдіру мәселелері талқыланды

Үкіметте хабарлағандай, отырыста бизнесті дамытуға кедергі болатын, нормаларды жою бөлігі бойынша заңнамаға тексеріс жүргізу мәселелері қаралды. Мемлекет басшысы «Қазақстандық жол-2050: Бір мақсат, бір мүдде, бір болашақ» атты Қазақстан халқына Жолдауында тиісті тапсырманы белгілеп берді.

Комиссия отырысы қортындысы бойынша 43 заңнамалық норманы ықшамдау мен жою туралы шешім қабылданды.

Атап айтқанда, әкімшілік құқық бұзушылықтар туралы Кодексте шенеуніктердің рұхсаттама беру мерзімін бұзу және оны негізсіз бермеуі жөнінде жауапкершілігін белгілейтін, түзетулер қарастырылған.

Жер кодексінде елді-мекендер шеңберінде құрылыс үшін жер телімдерін алу процедурасы ықшамдалады, «бір терезе» принципі енгізіледі, құжаттарды беру мерзімі қысқарады.

Бұдан басқа, Салық кодексінде алкогольдық өнімдер мен ЖЖМ сатуды жүзеге асыратын кәсіпкерлерге бақылау-кассалық машиналар орнатуды міндеттеу мерзімі 2014 жылдың 1 шілдесінен 2015 жылдың 1 шілдесіне ұзартылады.

Бұл бағыттағы жұмыстар тұрақты түрде жалғасатын болады.