ШҚО-да бірінші қажеттіліктегі тауардың құнын өсірмеу үшін бірқатар шара қолданылды

11 Ақпан, 2014 17:22

Шығыс Қазақстан облысында бірінші қажеттіліктегі тауарлардың құнын өсірмеу үшін бірқатар шара қолданылды. Шетелдік валюта бағамының өзгеруі, тенгенің құнсыздануы аймақтың бағалық саясатына әсер етпейді. Бұл пікірді шенеуніктер мен аймақтың кәсіпкерлері де қолдауға дайын.

Облыстық әкімдіктің хабарлауынша, өңір басшысы Бердібек Сапарбаевтың тапсырмасымен әлеуметтік маңызы бар тұтыну тауарлары бағасын арттырмау мақсатында 7 мобильді бақылаушы топ құрылды. Жұмыс тобы мүшелері сауда орындарындағы баға ауытқуларын назарларында ұстады. Сараптама нәтижесі көрсеткендей, өңірде азық-түлік бағасының қымбаттауы байқалмайды.

«Біздің міндетіміз баға көтерілуіне жол бермеу. Біз ортақ позицияны ұстануымыз керек», - деді облыс әкімінің орынбасары Нұрлыбек Шерубаев кәсіпкерлерге қарата.

Ортақ позицияны дайындау үшін өңірдегі банк жетекшілігі, сонымен қатар ірі тауар өндірушілер мен көтерме саудагерлердің қатысуымен жиын ұйымдастырылды. Құс еті, сүт өнімдері, ұн өнімдері өндірушелір алдағы бір жарым айда аталмыш өнімдердің бұрынғы бағасын сақтап тұру туралы бастаманы қолдады.

Айта кетейік, ШҚО-да бірінші сұрыптағы нан өз бағасымен сатыла береді. Есесіне облыс жетекшілігі электр қуаты мен су тарифын өзгертпеуге уәде берді.