Ә. Исекешев: Алматы инновациялық даму орталықтарының біріне айналуы тиіс

Вице-премьер бірқатар өнеркәсіптік өндірістерді аралап, өңірде ҮИИД Бағдарламасын жүзеге асыру және Алматыда инновациялық кластерді қалыптастыру мәселелері бойынша кеңес өткізді.

Сапар Инфекцияға қарсы препараттардың ғылыми орталығының қызметімен танысу арқылы басталды. Орталық өткен жылы туберкулезге қарсы жаңа дәрілік құралдың клиникалық сынауларының 3-кезеңін бастады. Сондай-ақ антибиотиктер потенциаторы (АП) жаңа дәрілік құралдың клиникалық сынауларының 1-кезеңін өткізуге дайындықты жүргізді.  

Екінші нысан - «Нобел» фармацевтикалық фабрикасы. 2011 жылы Индустрияландыру картасы аясында компания фармацевтикалық өндірісін халықаралық стандарттарға сәйкестендіріп жаңартты. Өндіріс қуаттылығы 50% артып, өнім түрлері көбейді. Бүгінгі күні зауыт дәрілік құралдың 150-ге тарта түрін шығарады.

Сондай-ақ Әсет Исекешев «Рахат» кондитерлік фабрикасының жұмысымен де танысты. Өткен жылы компанияның басшылығы ауысқаны белгілі. Кәсіпорынды кореялық инвесторлар басқарды. Вице-премьер өндіріс технологиясын көріп, өнімнің, әсіресе шоколадтың жоғарғы сапасын сақтау маңыздылығын атап өтті.

Бүгін Вице-премьер Әл-Фараби атындағы Қазақ Ұлттық Университетіне де барды. Бұл оқу орнында жас ғалымдармен кездесіп, ЖОО-ның және Индустрия және жаңа технология министрлігінің ынтымақтастық болашағын талқылады.

Сондай-ақ, инновациялық кластер қосымша жұмыс орындарын беріп, компаниялардың пайдасын молайтуы мүмкін, және инновациялық белсенділіктің өсуіне ықпал етеді.