2014 жылы «Қазагроөнім» Иранға 500 тонна қой етін экспорттауды жоспарлауда
«Мен «Қазақстан-2050» Стратегиясында Мемлекет басшысы тарапынан берілген міндеттемелерге назар аударғым келеді. Бұл бірінші кезекте, азық-түлік қауіпсіздігі. Жыл сайын Президент дәл осы мәселеге баса назар аударады. Бұл не деген сөз? Бұл Қазақстанның тауардың барлық түрі бойынша өзін өзі қамтамасыз етуі. Сонымен қатар одан кейінгі мәселе экспорт саудасы. Қазақстан қазірден бастап өзін экспорттаушы ел ретінде таныстырып, барлық өнім түрлері бойынша қажеттіліктерді қамтамасыз ете алатындай болуы керек», - дейді А.Баққожаев.
Оның айтуынша, соңғы жылдары Қазақстан мал шаруашылығында ет саласын нығайтуды қолға ала бастады.
«Өздеріңіз де түсінесіздер, соңғы кездері өзге елдерге импорт көлемі артып келеді. Осы жерде айта кеткім келетіні, мемлекет бұдан былай кәсіпкерлерге жағдай жасауды қойып, енді кәсіпкерліктер өздері бәсекеге қабелітті екендіктерін дәлелдеулері керек. Біздің компания, мал шаруашылығы өнімдерін сатып алушы ретінде біздің ауыл шаруашылық өнімін өндірушілерді бәсекеге қабілетті ету туралы мақсат қояды», - дейді А.Баққожаев.
Қазіргі таңда «Қазагроөнім» компаниясы 2014 жылға бірқатар шараларды жоспарлап, соның ішінде мал шаруашылығы өнімін сатып алу көлемін артыруды басты назарда ұстайды.
«Біріншіден, биылғы жылғы жүн сатып алу көлемі 2 мың тоннаға дейін артты. Демек, елімізде қазірде 6-7 мың тонна жүн өндірілуде. Келер жылы, биылғы шикізатты терең өңдеу жұмыстарын өз жоспарына сай орындайтын болсақ, биылғыдан да көп өнім шығара аламыз. Осылайша компания шикізат өнімінің барлық көлемін қамтып алатын болады», - дейді басқарма төрағасының орынбасары.
Сонымен қатар, ол 2014 жылғы бордақылау қораларына қатысты жоспарларымен бөлісті. Бүгінгі таңда, оның айтуынша, елімізде 12 мың мал басы сиятын 5 бордақылау алаңы бар.
«Бүгінде олар 50 пайыздық қуаттылықпен жұмыс істеуде. Биыл біз алғашқы жоба ретінде Ақмола облысынан 2 бордақылау алаңын қолға алмақпыз. Ол жыл сайын Иранға 5 мың тонна ірі қара, 500 тонна қой етін тасымалдамақ. Сонымен қатар, Ресейге тасымалданатын өнімді де ақсатпайтын боламыз», - дейді А.Баққожаев.
