Денсаулық сақтау министрі С.Қайырбекова Елбасы Жолдауын Шығыс Қазақстан облысында түсіндіруде
«Семей қаласында Салидат Қайырбекова қалалық №2 және №3 емханаларға барып, медициналық-санитариялық алғашқы көмек көрсету жайымен танысты. Медициналық қызметкерлермен әңгіме барысында Жолдауда медициналық-санитариялық алғашқы көмекті дамытуға басымдық берілгенін атап көрсетті. Осы орайда бастапқы буында қандай жүйелі іс-шаралар жүзеге асырылатынын баяндады», - деп ведомствода хабарлады.
Министр сондай-ақ, Семейде Өңірлік онкологиялық диспансерге ат басын бұрып, радиологиялық кластерді пайдалануға беру барысымен танысты.
Жекеменшік «IN-VITRA» медициналық мекемеге барған кезінде денсаулық сақтау саласында мемлекеттік-жекеменшік серіктестікті дамытудың маңыздылығын атап көрсетті.
Өңірдің медициналық қоғамдастығымен кездесуде Салидат Қайырбекова халық денсаулығын сақтау саласында мемлекет тарапынан атқарылып жатқан шаралар, салаға бағытталған қаражат, оны тиімді және ашық пайдалану турасында әңгімеледі.
Осы орайда ҚР ДСМ Медициналық және фармацетивкалық қызметті қадағалау комитеті тарапынан халыққа ұсынылатын қызмет сапасына бақылау күшейтілетінін алға тартты.
