Алматы облысында 2014 жылы 215 нысан салу жоспарланған

«Осы жылғы құрылыс басқармасының бюджет көлемі 57,241 млрд. теңгені құраса, оның 36,3 млрд. теңгесі республикалық, 20,9 млрд.-ы жергілікті бюджеттен қарастырылған»,- деп облыс әкімдігінде хабарлады.

Бөлінген қаржы есебінен 215 нысанның құрылысын жүргізу көзделсе, биыл соның 179-ы халық игілігіне берілмек. Қалған 36-ы келесі жылдың еншісіне қалуда.

Жалпы әрбір нысанның құрылыс жұмыстары үшін Үкімет тарапынан да қомақты қаржы қарастырылған. Осы тұста 50 білім нысанының құрылысы мен сейсмикалық нығайту істеріне республикалық және жергілікті бюджет есебінен 18 млрд. теңгеден аса қаражат бөлінген.

Сондай-ақ, денсаулық сақтау саласында да ауқымды жұмыстар атқарылуда. Үстіміздегі жылы аталған сала бойынша 41 нысанның құрылысы мен сейсмикалық нығайту жұмыстарына 10216 млн. теңге бөлінген. Оның 39-ы биыл іске қосылса, 2-еуі алдағы жылға өтпелі.

Үстіміздегі жылы барлығы 750,8 мың шаршы метр тұрғын үйдің құрылысын жүргізіп, пайдалануға беру жоспарланса, бұл үшін биыл 4,4 млрд. теңге қарастырылған.