2014 жылы табиғи монополияларды реттеу саласына 32 млрд теңге инвестиция салынады – А.Дүйсебаев

7 Ақпан, 2014 12:45

Биыл табиғи монополияларды реттеу саласына 32 млрд теңге шамасында инвестиция салынады. Бұл туралы ҚР Президенті жанындағы Орталық коммуникациялар қызметінің брифингінде Қазақстан Республикасы Табиғи монополияларды реттеу агенттігі төрағасының орынбасары Асылбек Дүйсебаев мәлімдеді.

«Бүгінде Қазақстан әлемнің ең дамыған 30 елінің қатарына енуге дайындалуда. Мемлекет басшысының «Қазақстан-2050» Стратегиясы мен Қазақстан халқына Жолдауындағы алға қойылған ел дамуының жаңа міндеттемелері экономиканың тиімді инфрақұрылымын құруға жағдай жасауды талап етеді. Ал бұл өз кезегінде модернизациясыз, жақсы инфрақұрылым желілерінсіз мүмкін емес. Сол себепті алдыңғы қатарлы елдердің тәжірибесін біз кезең-кезеңімен енгіземіз», - деді Асылбек Дүйсебаев.

Оның айтуынша, басты мақсат инвестициялық қызығушылықты арттыру мен кең көлемді жаңғырту жұмыстарын жасау.

«2013 жылы жалпы инвестиция көлемі 12 млрд теңгеден асса, 2014 жылы бұл көрсеткішті 32 млрд теңге шамасына жеткізу жоспарланған. Өткен жылы бас-аяғы табиғи монополия субъектілерінің 1073 өтініші қаралды. 406 өтініш бойынша қызмет көрсетіліп, оның 29-ы бойынша тариф төмендетілсе, 478 өтініш бойынша тариф көтерілді», - деді төраға орынбасары.

Дүйсебаевтың айтуынша, осылайша Агенттікте монополистердің өсіп келе жатқан «тәбетімен» күресуде.

2013 жылы монополистердің сұралатын табысы 175 млрд теңгеге дейін қысқартылған.

Басты мақсат, төраға орынбасарының айтуынша, инвестициялық қызығушылықты арттыру мен кең көлемді жаңғырту жұмыстарын жасау.