«Бәйтерек» ҰБХ» алдағы 5 жылда ел экономикасына 1,5 трлн теңгені құюға мүмкіндігі бар - Қ.Бішімбаев

6 Ақпан, 2014 14:50

«Бәйтерек» ұлттық басқару холдингі» АҚ алдағы 5 жылда ел экономикасына 1,5 трлн теңгені құюға мүмкіндігі бар. Бұл туралы ҚР Премьер-Министрі Серік Ахметовтың қатысуымен өткен ҚР Индустрия және жаңа технологиялар министрлігі қызметкерлерінің кеңейтілген отырысында «Бәйтерек» ҰБХ» АҚ басқарма төрағасы Қуандық Бішімбаев мәлім етті.

«Жалпы, 2013 жылдың қорытындысы бойынша еншілес компаниялардың табыс жиынтығы 40 млрд. теңгені құрайды деп күтілуде. Бұл 415%-ға көп, холдинг құрылған кезде ол 135% болады деп есептелген, яғни, 2012 жылы - 17 млрд теңге болады деп болжанған», - деді Қ. Бішімбаев.

Оның айтуынша, үдемелі индустриалды-инновациялық мемлекеттік бағдарламаны қаржыландыратын басты қаржы операторы ретінде «Бәйтерек» холдингінің негізгі міндеті «ұзақмерзімді» және «арзан» ақшамен қамтамасыз ету.

«Бұл ретте басты басымдық жеке инвестицияларды тартуға беріледі. Жалпы, холдингтің алдағы 5 жылда ел экономикасына 1,5 трлн теңгені құюға мүмкіндігі бар. Қомақты қаржы қажеттіліктің 30% жабады», - деп ол өз ойын толықтырды.

Айта кетейік, Холдинг ҚР Президентінің Жарлығымен 2013 жылы 22 мамырда құрылды. Оның құрамына мемлекеттік ҮИИД, «Қолжетімді баспана-2020», «Бизнестің жол картасы-2020»» бағдарламаларына қатысатын 10 компания кірді.

Барлық жаңалықтар