2013 жылы ауыл шаруашылығын қаржылық қолдау қоры 29,7 млрд теңге несие берді

«Қордың қарыз берген негізгі бағыттары мыналар: жұмыспен қамтуға қатысу, себу және ору науқандарында несие беру, ауылдық жерде шағын және орта кәсіпкерлікті несиелеу, шағын жылыжайларды салу мен пайдалануға қаржы бөлу, ауылдық жерлерге жұмыс істеуге келген бюджеттік сала мамандарының баспана алуына несие беру, ауылдық жерлердегі ауыл шаруашылығы емес бизнес түрлерін несиелеу», - делінген Ауыл шаруашылығын қаржылық қолдау қорының хабарламасында.

Сонымен қатар, 2013 жылы «Сыбаға» бағдарламасы бойынша етті мал шаруашылығын дамыту үшін 4,5 млрд теңге бөлінді. Нәтижесінде 24 мың ірі қара мал сатып алынды.

Естеріңізге сала кетейік, қордың басты міндеттемесі ауыл халқы мен шағын ауыл шаруашылық тауарларын өндірушілердің несиеге қол жеткізуін қамтамасыз ету, ауыл халқының жағдайын арттырып, кәсіпкерліктің дамуына көмек көрсету.

Қордың облыстың маңызы бар қалаларда бөлімшелері қызмет ететінін естеріңізге сала кетеміз.

Айта кету керек, 2014 жылы 27 млрд теңгеге қарыз беру көзделген. Сонымен қатар, «ҚазАгро» Холдингінен 4,7 млрд теңге алу жоспарланған.