«Жігер» мүгедек спортшылар қоғамдық бірлестігінің төрағасы: Бізді құрметтеп, қамқорлық көрсетеді!

4 Ақпан, 2014 17:01

ҚР Президенті Қазақстан халқына биылғы жылғы Жолдауында бізге, мүгедектерге баса назар аударды. Мүмкіндігі шектеулі жандардың өмірін жақсарту жолындағы басты тапсырмаларды атап көрсетті, дейді Қызылорда облысындағы «Жігер» мүгедек спортшылар қоғамдық бірлестігінің төрағасы, II топтық мүгедек Мұрат Жұмаділдаев.

«Біздің облысымызда қоғамда мүгедектер үшін кедергісіз орта қалыптастыру жұмыстары жүргізілуде. Дүкендерде, дәріханаларда, ауруханалар мен өзге де әлеуметтік маңызы бар нысандарда мүмкіндігі шектеулі жандардың еркін кіріп-шыға алуы үшін ыңғайлы баспалдақтар, арнайы жарық және дауыс құрылғылары орнатылған. Мүгедек жандардың қатынауына қиындық тудырмайтын автобустарды сатып алу да қоғамда мүмкіндігі шектеулі жандардың кедергісіз өмір сүруіне жағдай жасау болып табылады», - дейді қоғамдық бірлестік төрағасы.

Оның айтуынша, мүмкіндігі шектеулі жандарға медициналық және әлеуметтік көмек көрсету үшін өңірде республика бойынша теңдессіз мекеме болып табылатын мүгедектерді оңалту орталығы ашылды.

«Нұрсұлтан Назарбаевтың ҚР Үкіметіне 2015 жылдың 1 шілдесінен бастап асыраушысынан айырылған және мүгедектігі бар жандарға төленетін әлеуметтік төлемақы көлемін 25 пайызға арттыру тапсырмасы бізді қуантады. Сонымен қатар, мүгедектер бірлестігі қызметінің құқықтық базасын жетілдіру де біз үшін жағымды жаңалық. Бізді ескеріп, бізге жағдай жасайды! Мен екінші топ мүгедегімін. Сөзсіз, қаржылық қолдаулар тек менің отбасым үшін ғана пайдалы емес, еліміздегі барлық мүмкіндігі шектеулі жандарға айтарлықтай көмек», - дейді Мұрат Жұмаділдаев.

Барлық жаңалықтар