Б.Сағынтаев ұшу қауіпсіздігі бойынша ұлттық бағдарлама дайындауды тапсырды

3 Ақпан, 2014 14:30

Бүгін Көлік және коммуникация министрлігі қызметкерлерінің кеңейтілген отырысында ҚР Премьер-Министрінің бірінші орынбасары Бақытжан Сағынтаев ұшу қауіпсіздігін қаматамасыз ететін ұлттық бағдарлама дайындаудың маңыздылығын атап өтті.

«Air Astana» компаниясы дамып келеді, жалпы әуе саласы бойынша елімізде алға ілгерілеушілік байқалады. Осы орайда мен ұшу қауіпсіздігін қамтамасыз ету туралы айтқым келеді. Тек соңғы 5 жылдың өзінде азаматтық әуе қозғалысында 10 әуе апаттың орын алғаны белгілі. Мұның себептері де әр қилы. Адам факторынан бастап техникалық ақауларға дейін. Бірақ қандай себеп болса да жолаушылардың өміріне келетін қауіп келді. Сол себепті ұшу қауіпсіздігін қамтамсыз ететін ұлттық бағдарламаны дайындау мәселесін қолға алуымыз керек», - деді Бас уәзірдің бірінші орынбасары.

Оның айтуынша, «апаттың қорытындысын тек бір жыл уақыт өткеннен кейін ғана еске алмай, әуе апаттарын зерттеу барысын бұқараға дер кезінде хабарлап отыру керек. Біз барынша жария жұмыс істеп, халықтың біздің жұмысымызды бақылауына жағдай жасауымыз керек».

Айта кетейік, бүгін ҚР ККМ қызметкерлерінің кеңейтілген отырысында ведомствоның 2013 жылғы жұмыс қорытындысы жарияланды.

Өткен жылы автокөлік жолдарының 2200 шақырымына жөндеу жұмыстары жүргізіліп, 13 электронды таразы орнатылған. Транспортты бақылаудың 11 стационарлы бекеті жабылған. Теңіз порттарының өткізу мүмкіндігі 16,8 млн тоннаға дейін кеңейтіліп, 15 жаңа халықаралық әуе бағыты мен 6 жаңа жолаушылар бағыты ашылды.

Барлық жаңалықтар