2013 жылы тұрғындарға 38 млн-нан астам электрондық қызмет көрсетілді - ККМ

3 Ақпан, 2014 14:10

2013 жылы электрондық үкімет арқылы тұрғындарға 38 млн-нан астам электрондық қызмет көрсетілді. Бұл туралы бүгін ҚР Көлік және коммуникация министрлігінде ҚР Премьер-Министрінің орынбасары Б.Сағынтаевтың қатысуымен өткен коллегияда ведомство басшысы А. Жұмағалиев хабарлады.

«Автоматтандыру жүйесі бойынша бір жылда 241 қызмет пен рұқсат беру автоматтандырылды. Жалпы, 570 автоматтандырылған қызмет түрі бойынша электронды үкімет арқылы тұрғындарға 38 млн-нан астам электронды қызмет көрсетілді. Ал, бір жыл бұрын бұл көрсеткіш 21,4 млн. құраған», - деді министр.

Сонымен қатар, 40 млн. құжаттың көшірмесі оңтайландырылды. Нәтижесінде, халыққа ХҚКО беретін құжаттардың көшірмесін алып жүрмеуге мүмкіндік туды», - деп министр атап өтті.

2014 жылы smart government дамыту жұмыстары жалғасын табады. Соным қатар, порталды пайдаланушы азаматтардың жеке кабинеті ашылып, олардың жеке мәліметтерін бақылауда ұстауына мүмкіндік жасалады.

Сондай-ақ, биыл 160 жаңа электронды қызмет пен рұқсат беру автоматтандырылады. Ал, мобильдік электронды қызмет пен жүйе 50-ге дейін кеңейтіледі.

Ұялы байланыстың сапасын арттыру мақсатында министрлік аймақтардағы ұялы байланысты тексеру жұмыстарын жалғастырады. Бұдан басқа, 2014 жылы абоненттің бір оператордан екінші операторға көшу барысында бұрынғы номерін сақтап қалу технологиясын тестілеу көзделген.

Барлық жаңалықтар