В.Божко: Мектептердегі оқытудың тоқтатылатыны туралы смс-хабарламалардың кешігуі техникалық себептерге байланысты
31 Қаңтар, 2014 16:17
Мектептердегі оқытудың тоқтатылатыны туралы смс-хабарламалардың келмей жатқаны техникалық себептерге байланысты. Бұл жайлы ҚР Президенті жанындағы Орталық коммуникациялар қызметіндегі «Мемлекет басшысының Қазақстан халқына «Қазақстандық жол-2050»: Бір мақсат, бір мүдде, бір болашақ» Жолдауындағы 2014 жыл тапсырмалары туралы» брифингінде төтенше жағдайлар министрі Владимир Божко мәлімдеді.
«Кейбір ата-аналар мектептерде сабақтың болмайтыны туралы хабарламалардың кеш келетіні жайлы шағымданады. Техникалық себептерге байланысты смс-хабарламалар әр абонентке жеке-жеке барады. Ал бұның жылдамдығы сағатына 200 мың абонент екенін ескерсек, кейбір абонентке кешігіп баруы заңды. Нәтижесінде кей ата-ана аталмыш хабарламаны 2,5 сағатқа кеш алып отыр»,-деді министр.
Оның айутынша, ұялы байланыс желілерінде жүктелу қызметтерінде кешігулер болуы мүмкін. Оған байланыс аясынан тыс болу мен телефонның сөніп тұруы да сеп болуы да ғажап емес.
Сонымен қатар, смс-хабарламаларға қосымша мектептерде сабақтардың болмайтыны туралы ақпаратты кабельді арналардағы жүгіртпе жолдардан да оқуға болады.
