Н. Назарбаев: Дүниежүзілік экономикалық форум – әлемдік экономика бойынша пікір алмасу алаңы
«Мемлекет басшысы Дүниежүзілік экономикалық форум әлемдік экономикадағы жағдайлар мен оның даму перспективалары туралы пікір алмасу алаңы болып саналатынын атап өтті», - делінген хабарламада.
«Давос – тығыз кездесулер орны, себебі форумға мемлекет пен үкіметтер басшылары, халықаралық ұйымдар мен ірі компаниялар жетекшілері көп жиналады. Қазақстан тәуелсіздік алғаннан кейін мен бұл форумға жиі келіп тұрдым, өйткені ол кезде біздің ел танымал емес еді. Сапарлардың мақсаты жас республика туралы әңгімелеп, инвесторлар назарын аудару болатын. Инвесторлар кеңесін құру бастамасы да дәл осында көтерілгенін еске сала кетейін. Ал бүгін 2050 Стратегиясының қабылдануына және онда әлемдегі дамыған 30 елдің қатарына кіру мақсаты қойылғанына байланысты осы жөнінде форумға қатысушыларға әңгімелеп беру қажеттігі туып отыр», – Қазақстан Президенті.
Нұрсұлтан Назарбаев форум президенті К.Швабпен, сондай-ақ өзге мемлекеттер мен үкіметтер басшыларымен өткен кездесулер туралы хабарлады.
«Мен Қазақстанда жұмыс істеп жатқан компаниялар басшыларымен де кездесулер өткізіп тұрамын. Біз олардың еліміздегі алдағы уақытта қызметінің перспективаларын талқылаймыз. Басты мәселе сонда – өндіруші салаларда жұмыс істеп жатқан трансұлттық компаниялар өз кәсіпорындары үшін бізде сервистік компаниялар құруға тырысуы керек. Бұл жайт Қазақстанды индустрияландыру секторына қатысты. Менімен әңгімелескен кісілер еліміздің даму болашағы үшін инфрақұрылымды дамытуға – автожолдар мен теміржолдар, порттар, аэропорттар салуға деген біздің ұмтылысымыздың маңыздылығын айтады. Өткізілген кездесулер бұл орайда өте маңызды болды», – деді Мемлекет басшысы.
Нұрсұлтан Назарбаев өзінің Еуропа қайта құру және даму банкінің басшысы С.Чакрабартимен әңгімелесуі жөнінде айтып берді.
«ЕҚДБ Қазақстанға 6,5 миллиард доллар салды. Кездесуде мен шағын және орта бизнесті қолдауға көбірек көңіл бөлуді өтіндім. Банк қазірдің өзінде 162 миллион долларлық жобаларды қаржыландырды, биыл бизнесті несиелеуге 77 миллион доллар бөлінді», – деді Қазақстан Президенті.
Бұған қоса, Қазақстан Президенті кездесулер тақырыбының бірі алдағы ЭКСПО 2017 көрмесін өткізуге инвестициялар тарту туралы болғанын атап өтті.
Мемлекет басшысы бұрынғы серіктестермен кездесіп, жаңа адамдармен танысу үшін форумның жақсы мүмкіндік екенін атап өтті.
«Өзге елдердің көшбасшылары біздің өңірдің ахуалы мен даму перспективаларына қатысты менің пікірімді білгісі келеді. Иранның ядролық бағдарламасы, Ауғанстан мен Сириядағы ахуалды реттеу мәселелері, Украинадағы оқиғалар баршаны қызықтырады. Осылайша, өзара пікір алмасулар нәтижесінде пайдалы ұсыныстар мен шешімдер туады. Форум басқарушы орган болып саналмайды, ол тек түрлі қиын жағдайлардан шығудың ықтимал жолдарын ұсынады», – деді Нұрсұлтан Назарбаев.
Бұдан бөлек, Қазақстан Президенті форумда бірқатар қауіпті сын-қатерлер мен болашақ дағдарыстар анықталғанын хабарлады.
«Осыған байланысты, дағдарыстың артта қалғаны туралы бәлендей тоқмейілсу жоқ. Қиындықтар әлі алда. Еуропалық одақтағы басты қиындық – әсіресе жастар арасындағы жұмыссыздық, сондай-ақ еуро валютасына қатысты сенімсіз көзқарас. Жылдың ортасына қарай белгіленген Еуропарламент сайлауы өте маңызды болмақ. Еуропа мен АҚШ-тың экономикасы баяу да болса, көтеріліп келеді, бұл жақсы жаңалық. Оған қоса Қытай экономикасының төмендеуі байқалуда, бұл өз кезегінде алаңдаушылық тудыратын нышан болып отыр. Біз үшін Ресей экономикасының жағдайы да маңызды. Бізді осы мәселелердің бәрі мазалайды, өйткені біз әлемдік қоғамдастықтың бір бөлігіміз. Әлемде болған нәрсенің бәрі бізге де әсер етеді. Біздің міндетіміз – соны дер кезінде аңдап, ықтимал қиын ахуалдардан аман шығудың тиісті шараларын қабылдау», – деді Нұрсұлтан Назарбаев.
