Қызылорда облысында жас отбасыларға арналған қолжетімді баспана көлемі артады

«Қызылорда облысының әкімі Қырымбек Көшербаев «Тұрғын үй құрылыс жинақ банкі» АҚ Басқарма төрағасы Айбатыр Жұмағұловты қабылдады. Кездесу барысында «Қолжетімді баспана-2020» бағдарламасын жүзеге асыру барысы мен пайдалануға беріліп жатқан баспана санын арттыру мүмкіндігі әңгіме арқауына айналды. Сондай-ақ, жас отбасыларға берілетін тұрғын үй көлемін 3-4 есе үлкейту жоспарлануда. Ал, халықтың барлық санатына арналған тұрғын үйлердің шаршы метрі жоқ дегенде бұрынғы деңгейде қала бермек. Бұл ұсыныстар қысқа мерзім ішінде талқыланатын болады», - делінген хабарламада.

А.Жұмағұловтың айтуынша, тұрғын үйлер 1-2 қабатты болады. Бұдан басқа, ағымдағы жылы баспана салу үшін бюджет қаражатынан бөлек, инвесторлар мен жергілікті кәсіпорындарды тарту жұмыстары жүргізіледі.

Айта кетерлік жайт, Қызылорда облысында осы уақытқа дейін «Тұрғын үй құрылыс жинақ банкі» желісі арқылы «Халықтың барлық санаттарына арналған тұрғын үй» бағыты бойынша көлемі 20 мың шаршы метрді құрайтын 5-тен астам үй, «Жас отбасыларға арналған тұрғын үй» санатында көлемі 15 мың шаршы метрді құрайтын бір үй пайдалануға берілген.

Сонымен қатар, биыл «Жас отбасыларға арналған тұрғын үй» санаты бойынша көлемі 14 мың шаршы метр болатын 5 үй, «Халықтың барлық санаттарына арналған тұрғын үй» бағыты бойынша көлемі 15 мың шаршы метрді құрайтын 5 үй үлестірілетін болады.