Асқар Мәмин: Нақты істер Үкіметіне айналуымыз тиіс

26 Ақпан, 2019 11:34

Бүгін таңертең Астана уақытымен 9:00 ҚР Премьер-Министрі Асқар Мәмин жаңа Үкіметтің алғашқы отырысын өткізді.

Асқар Ұзақбайұлы алғаш кірген министрлердің ант беру рәсімін бастамас бұрын артылған сенімді ақтау керектігін атап өтті.

"Құрметті Үкімет мүшелері, Мемлекет басшысы бізге үлкен сенім артып отыр. Бұл асқан жауапкершілік. Сол сенімді ақтауымыз керек. Үкіметтің жаңа құрамы айқын нәтижелерге бағдар алған нақты істер Үкіметіне айналуы тиіс".

Асқар Ұзақбайұлының сөйлеген сөзінен-ақ, оның өте білікті, өз-өзіне сенімді саясаткер екені бірден аңғарылды. Соңғы бір жарым жыл уақытта ҚР Премьер-министрінің бірінші орынбасары болып жүруі жаңа премьердің елдегі барлық жағдайдан, істелініп жатқан жұмыстардан толық хабардар екенін білдіреді.

«Мемлекет басшысы еліміздің әлеуметтік және экономикалық дамуын жаңа сапалы деңгейге шығару, халықтың табысы мен тұрмыс деңгейін арттыру, тиімді жаңа жұмыс орындарын құру, шағын және орта бизнесті дамытуды бірінші кезекке қойып отыр. Осындай нақты іс-шаралар нәтижесінде халықтың әл-ауқатын арттыра аламыз», - деп атап өтті Асқар Ұзақбайұлы.

ҚР Премьер-министрі ертең Елбасы Нұрсұлтан Назарбаевтың қатысуымен өтетін еліміздің жетекші саяси құрылымы «Нұр-Отан» халықтық-демократиялық партиясының съезіне тоқтала кетті.

«Ертең «Нұр-Отан» партиясының съезінде халықты әлеуметтік қолдауды күшейту және олардың тұрмыс сапасын арттыру бойынша бірқатар жаңа шаралар жарияланады. Осыған орай келесі Үкімет отырысында Елбасының тапсырмаларын орындауға бағытталған шараларды талқылайтын боламыз», - деді Асқар Мәмин.

Ізінше «ҚР Үкіметі туралы» конституциялық заңын орындау мақсатында жаңа министрлер Ата заңға қолдарын қойып тұрып халық алдында адал жұмыс істеуге ант берді. Олар - Қазақстан Республикасының Ұлттық экономика министрі қызметіне келген Ерболат Дәленов, Қазақстан Республикасының Ауыл шаруашылығы министрі болған Сапархан Омаров, ҚР Білім жəне ғылым министрі Күлəш Шәмшидинова мен ҚР Индустрия және инфрақұрылымдық даму министрі Роман Скляр.

Данияр Оралов

Фото: Бауыржан Жуасбаев

Ұқсас мақалалар:

Халықтың әл-ауқатын жақсартуға бағытталған – Съезд туралы пікірлер

Әр балаға 21 мың теңге - Н.Назарбаев

Бақуатты қоғам: онжылдықтың 10 мақсаты

Инфографика: қазақстандықтардың әл-ауқатын арттыру