Қасым-Жомарт Тоқаев Мюнхен конференциясына қатысты

18 Ақпан, 2019 10:51

Конференция 35 мемлекет басшысы мен премьер-министрінің, 50 елдің сыртқы істер министрі мен 30 мемлекеттің қорғаныс министрінің басын қосты.

БҰҰ жұмысының тиімділігін арттыру керек. Барлық халықаралық қатынастардың ордасы саналатын ұйым әлемдік қауымдастық алдында тұрған көптеген проблемаларды шеше алмай отыр. Сол себепті, әлемнің саяси элитасы бірлесіп әрекет етуі тиіс.

15-17 ақпан аралығында Германия Федеративтік Республикасының Мюнхен қаласында өткен конференцияға қатысушылар осындай пікір айтып отыр.

Беделді сарапшылар мен ғалымдар, саясаткерлер, бір сөзбен айтқанда әлемдік саяси элита жаһандық және өңірлік қауіпсіздікті қамтамасыз ету, Таяу Шығыс пен Балқан түбегі, Қапқаз аумағындағы қақтығыстарды реттеу механизмдерін талқыға салды.

Президенттер мен парламент спикерлері, премьер-министрлер, халықаралық ұйым басшылары, беделді сарапшылар сессиялық мәжілістерде халықаралық сауда қарым-қатынасы, қару-жарақ нарығын бақылауда ұстау, климаттық өзгерістер, кибертехнология мен киберқауіпсіздік бойынша өз ойларын ортаға салды.

Қасым-Жомарт Тоқаев «Әлемдегі ұлттық қауіпсіздік» тақырыбында өткен дөңгелек үстелге және жоғарыда атап өткен тематикалық сессия жұмыстарына қатысты.