Қазақстан мен БАӘ: Ынтымақтастық қандай салаларды қамтиды
«Қазақстан мен БАӘ арасында өте тығыз қарым-қатынас орнатылған. Ең алдымен ол Қазақстан Президенті Нұрсұлтан Назарбаев пен БАӘ Президенті шейх Халифа бен Заид Әл Нахаян арасындағы достастық қарым-қатынастың нәтижесі. Біз қайырымдылық шараларын жиі ұйымдастырып тұрамыз. Шаралар әртүрлі жағдайларға қатысты болады, былтыр мысалы Заид жылы болды. Биыл толеранттық жылы деп жатырмыз. Осы кезеңдерге байланысты біз қайырымдылық іс-шараларды өткізіп отырамыз», - деді Қазақстан Республикасындағы Біріккен Араб Әмірліктерінің Төтенше және өкілетті елшісі Мұхаммед Ахмат Әл-Жабир.
Елші атап өткендей, қайырымдылық шаралары тек Астана қаласында ғана емес, елдің барлық өңірлерінде жүзеге асырылады.
«Былтыр БАӘ Қазақстанда қайырымдылық шараларын өткізуге 400 мың долларға жуық қаражат жұмсады. Қайырымдылық шараларды ұйымдастырудың басты қозғаушы күші Қазақстанның оны қажеттілік ететінінде емес, бұл ең алдымен қазақ еліне деген құрме пен достықтың белгісі», - деді елші.
Сондай-ақ, елші мырза Шымкент қаласында мектеп бар екенін атап өтіп, қазір балалар үйінің құрылысы жүріп жатқанын айтты.
Атап өтсек, Астанадағы №84 мектеп-лицейді де шейх Халиф ибн Заид Әл Нахайян өз тарапынан сыйлық ретінде салып берген болатын.
«Бұл мектеппен қарым-қатынасымыз әрі қарай дамып жатыр. Мысалы, 2018 жылдың аяғында мектеп ішінен орталық аштық. Оның ішін толықтай жабдықтап, қажетті құрал-жабдықпен қамтамасыз еткен болатынбыз», - деді Біріккен Араб Әмірліктерінің Төтенше және өкілетті елшісі.
Елші атап өткендей, БАӘ ғылым, білім, медицина саласын дамытуға ерекше көңіл бөледі.
«Болашақта 84-ші мектеп сынды білім ошақтарының салынуына үлес қосуға мүдделіміз. Сондай-ақ, БАӘ Қазақстанмен ынтымақтастықты жан-жақты дамытуға ниетті», - деді елші мырза.
Сонымен қатар, Біріккен Араб Әмірліктерінің Төтенше және өкілетті елшісі елшіліктің алдағы жоспарымен бөлісті.
«Осы күнге дейін БАӘ-нің Қазақстандағы елшілері тиімді жұмыс істеді. Мен елші болған екі жылдың ішінде Елшілік Қазақстанмен ынтымақтастықты дамыту саласында бірқатар жұмыстарды атқарды. Бірқатар келісімдерге де қол қойылды. Сот істері, инвестиция тарту, визасыз режим мәселесі сынды ауқымды, маңызды істер тындырылды. Бұл жұмыстар екі ел арасындағы ынтымақтастықты нығайтып, қарым-қатынасты жаңа деңгейге шығарады деген үміттеміз. Біз екі ел арасындағы келісімдермен шектелмейміз. Одан да тыс жұмыс істейміз. Қауіпсіздік саласында да ынтымақтастықты дамыту жоспарда бар. Елшілік тарапынан биылғы жаңа ұсыныс БАӘ қызметкерлерін ҚР-ға алып келіп, ІІМ-мен байланыс негізінде тәжірибе алмасуды ойластырып отыр», - деді Біріккен Араб Әмірліктерінің Төтенше және өкілетті елшісі Мұхаммед Ахмат Әл-Жабир.
Сонымен қатар, елші мырза екі ел арасындағы туризм саласын дамыту да ең басты мақсаттардың бірі екенін атап өтті.
«БАӘ халқы Қазақстан жайында көп ақпараттанбаған еді. Қазір біз осы жұмыстарды қолға алып жатырмыз. Соңғы екі жылда Қазақстанның барлық туристік орындарын баяндайтын анықтама жасадық. Қазір БАӘ азаматтары Қазақстанды танып жатыр. Екі елдің салт-дәстүрі мен мінез-құлықтары ұқсас екенін де байқадық. Бұл жұмыс әрі қарай жалғасын табатын болады», - деді ол.
Сондай-ақ, елші болашақта мұнай-химия саласында да бірқатар жобалар іске асатынын баяндады.
«Біз сыбайлас жемқорлыққа қарсы агенттікпен де қарым-қатынас орнаттық. Оларға БАӘ-дан мамандар келіп, тәжірибе алмасты. Болашақта біз ҚР делегациясын БАӘ-ға апарып, біздегі жемқорлыққа қарсы ұйымдардың жұмысымен таныстыруды көздеп отырмыз. БАӘ-да полиция қызметі өте дамыған, мүмкіндіктері мол. Бірақ, оларға тәжірибе жетіспейді. Ал біз ҚР полиция қызметкерлерінің жұмысын бақыладық, олардың тәжірибелері өте мол. Сондықтан да тәжірибе алмасу мақсатында осы тектес шараларды жүргізуді жөн көріп отырмыз. Медицина саласына қатысты да зерттеулер жасадық. Медбикелерді тәжірибе алмасуға, жұмысқа тарту бойынша ұсыныстар түсіп жатады. Алайда, медбикелердің тілді білмеуі проблема болып отыр. Сол себепті де барынша барлық салаларды қамтуға тырысып жатырмыз», - деді ол.
Айта кетейік, Қазақстан Республикасы мен Біріккен Араб Әмірліктері арасындағы дипломатиялық қатынастар 1992 жылғы 1 қазанда орнады. ҚР-ның БАӘ-дегі Елшілігі 2006 жылдың қыркүйек айында ашылды. Дубай қаласындағы ҚР Бас консулдығы 1997 жылдан бері жұмыс істейді.
Аягөз Құрмаш
Фото: Гүлжан Раманқұлова
