ҚР-да өңірлер мен шағын қалаларды дамыту бағдарламасы қабылданады – ӨДМ
21 Қаңтар, 2014 11:21
Қазақстанда 2014 жылдың 1 маусымында өңірлер мен шағын қалаларды дамыту бағдарламасын қабылдау жоспарланып отыр, деп хабарлайды ҚР Өңірлік даму министрлігінің баспасөз қызметі.
«Қазіргі таңда Өңірлік даму министрлігі 2014 жылдың 1 маусымында қабылдануы жоспарланып отырған өңірлер мен шағын қалаларды дамыту бағдарламасының жобасы, моноқалаларды дамыту бағдарламасының қосымша бизнесті қолдау құралдары енгізілген кезекті өзгерістер пакетін дайындап қойды», - делінген хабарламада.
Бағдарламаға өз бизнестерін ашқысы келген бастауыш кәсіпкерлерді, жастарды, әйел кәсіпкерлерді, қарттарды, мүгедек жандарды қолдау туралы Мемлекет басшысының тапсырмасы қосылады.
Атап айтар болсақ, ауылдардағы, моноқалалардағы, шағын қалалардағы кәсіпкерлер жобасын кепілдендіру мен субсидиялаудың жекелеген шарттары қарастырылады.
