Рухани жаңғыру: Түркістандық өнерпаздар Астанаға тарту жасады

20 Маусым, 2018 09:53

Елорда төрінде «Асқақтай бер, Астана!» Түркістан облысы өнерпаздарының гала-концерті өтті. Елбасының «Болашаққа бағдар: рухани жаңғыру» бағдарламалық мақаласы мен Астана қаласының 20 жылдығына орай «Ән мен күй әлдилейді Астананы» атты Түркістан облысының Астанадағы мәдени күндері аясында ұйымдастырылып отыр.Сонымен қатар, елордада қолөнер және қылқалам шеберлерінің кешенді көрмесі өтті.

Түркістан облысының халқын еліміздің елордасы – Астана қаласының 20 жылдық мерейтойын сезіндіру мақсатында «Ел жүрегі - Астана» тақырыбында көрмелік кешеннің ашылуымен басталып, бүгінгі таңға дейін 760 іс-шара өткізілген болатын.

Елорда құрметіне орай облыстың елді мекендерінде 26 көшеге «Астана» атауы берілді.

«Елордаға сыйлық» жобасы бойынша Түркістан облысы тарапынан Астана қаласына тарту ретінде Есіл өзені бойында орталық саябақ пен Министрліктер үйі аралығына дейін 5,173 шақырым веложол салынуда.

Әкімдіктің мәліметінше, концерт «Шарықтай бер, Астана» театрландырылған-хореографиялық композициясынан бастау алып, дәстүрлі әндер шеруі, қазақ және классикалық, Ш.Қалдаяқов әндерінен попурри, «Дала рухы» композициясымен жалғасын тапты.

Тұран елі өнерпаздарының өнерін тамашалауға ҚР Парламенті мәжілісінің депутаттары мен зиялы қауым өкілдері және республикалық бұқаралық ақпарат құралдары қатысты.

Сондай-ақ, «Рухани жаңғыру» аясында Түркістан облысының қолөнер және қылқалам шеберлерінің кешенді көрмесі өтті.

«Рухани жаңғыру» бағдарламасының өңірде жүзеге асырылған жұмыстарының бір жылдық қорытынды көрмесі елордадағы «Астана» концерт залының фойесінде ұйымдастырылды.

Мұндағы көрмеге 500-ге жуық жұмыстар қойылып, Астана жұртшылығына таныстырылды.

Кешенді көрмеде келушілер назарына Түркістан облысының қасиетті, киелі жерлер тізіміне енген тарихи-мәдени орындары, мәдени іс-шараларда түсірілген көркем, анимациялық, деректі фильмдер туралы видео және суреттер, белгілі қылқалам шеберлерінің шығармалары, қолөнер шеберлерінің жасаған бұйымдары, облыстың көркем жерлері бейнеленген фотосуреттер, сондай-ақ, ақын-жазушылардың кітаптары мен ұлттық киімдер, Астананың көрікті орындары бейнеленген кілемдер, «Қазақстандағы 100 жаңа есім» жобасына енген азаматтар туралы мәліметтер орналастырылған.