Ақмола облысында ешкі сүтін қайта өңдеу зауыты ашылды

8 Қаңтар, 2018 20:35

Тоңазытқыш қондырғыларымен, зертханалық және ірімшік пісетін камерамен жабдықталған сүт зауытының алаңы 1152 шаршы метрді құрайды.

Ақмола облысының Целиноград ауданындағы Қажымұқан ауылында ешкі сүтін қайта өңдеуге арналған «Зеренді» ЖШС шаруа қожалығы іске қосылды, деп хабарлайды Ішкі саясат басқармасының өңірлік коммуникациялар қызметі.

«Зеренді» асыл тұқымды ешкі шаруа қожалығы максималды сүт өнімділігін алу үшін үздік генетикадағы ешкілерді өсіру орталығы болып табылады. Шаруа қожалығы 2016 жылы пайдалануға берілді. Жалпы ауданы 20 гектар. Ешкі шаруашылығында ешкі, сауу сөресі, жылына 350 тонна қуаттылығы бар сүт зауыты, азық-түлік диірмені, азық-түлік сақтауға арналған ангар бар. Жобаның құны - 925 млн. тенгені құрайды.

Қазіргі уақытта шаруа қожалығында 500-ден астам асыл тұқымды ешкі бар, оның ішінде Голландиядан 334 бас, ал қалған 164 бас қазірдің өзінде ферма аумағында өндірілген.

Бүгінгі күні Италиядан келген мамандар ешкі сүтін және сүт өнімдерін қайта өңдеуді сағатына бір тоннаға дейін жеткізуді қарастырады.