Қарағандыдағы қоғамдық көліктерде электронды билеттеу жүйесі мамырда іске қосылады

«Электронды билеттеу бағдарламасын «SMART CARD» алматылық компаниясы жүзеге асыруда. Онымен біз өзара серіктестік туралы меморандумға қол қойдық. Қазіргі таңда қаламыздың барлық 9 жолаушы тасымалдаушы мекемелері компаниямен келісімшарт жасасты. Қаңтардың соңына дейін қарағандылық филиал ашылады. Содан соң қала автобустарына төлем терминалдарын орнату, сондай-ақ төлем карталарын жасау жұмыстары басталады» , - деп мәлімдеді Қарағанды қаласының әкімі. 

Жүйені мамырда іске қосу жоспарланып отыр. Жеңілдік берілетін азаматтар мен мектеп оқушылары үшін фото суреті бар жеке дара карталар әзірленеді, соның арқасында жалған карталарды жасау және басқа адамдарға беру жайттары шектетіледі. Сонымен қатар жолаушылар төлемді ұялы байланыс арқылы төлей алатын болады. 

Қала әкімі электронды билеттеу жүйесінің артықшылықтарын атап өтті. 

«Бірінші кезекте бұл үлкен оң әсер береді, себебі жолаушы тасымалдаушылардың қаржылық қызметінің ашықтығын қамтамасыз етеді. Сонымен қатар бұл жүйе жергілікті атқарушы органдарға жеңілдік алатын азаматтар санатын тасымалдау және әлеуметтік маңызы бар маршруттарды субсидиялауда нысаналы демеуқаржы жүзеге асыруға мүмкіндік береді», - деп атап өтті Нұрлан Әубәкіров. 

Өз кезегінде, жолаушы тасымалдаушылардың кірісін толық жиналымдар есебінен және сәйкесінше, бюджетке олардың қызметінен түсетін түсімдер есебінен ұлғайту жоспарланып отыр. 
Құқық қорғау органдарымен жасалған келісімге сай әрбір автобуста 4 бейне бақылау камералары орнатылатын болады. 
Ерлан Қошанов жүйені енгізу процессін тұрақты бақылауда ұстауды тапсырды. 

«Бұл барлығымыз үшін қажет және маңызды жүйе. Ең бастысы – жолаушы тасымалдау көліктерінің жұмыс сапасын жоғарылату. Әзірге шағымдар көп», - деп атап айтты облыс әкімі.