Ержан Ашықбаев: Ауғанстан мәселесі Орта Азия елдері үшін экономикалық маңызға ие

Оның айтуынша БҰҰ Қауіпсіздік Кеңесінде төрағалық ету жоғары халықаралық мәртебе есептеледі. Қауіпсіздік Кеңесі мәжбүрлеу шараларына, экономикалық санкцияларға немесе ұжымдық әскери әрекеттерге қатысты шешімдер қабылдай алады.

Сонымен қатар, Е.Ашықбаев Ауғанстан мәселесі жөніндегі Қазақстандық позиция туралы мәлімет берді.

«Қазақстан Орталық Азия мемлекеттерінің арасында Қауіпсіздік кеңесіне төраға болған алғашқы ел, сондықтан біз тек ұлттық мүддемізді ғана көздемей, Орталық Азия елдерінің тұтастай пікірлерін білдіріп келдік. Ауғанстан мәселесі – Орталық Азия қауіпсіздігіне кедергі келтіретін фактор. Ондағы жағдайдың тұрақсыздығы көршілес елдерге де, бізге де өз әсерін тигізеді. Алайда, біз Ауғанстанды өмір бақи қауып-қатер ретінде қарайтын болсақ, ондағы тұрақтылық ешқашан орнамайды. Сондықтан халықаралық қауымдастықтар арқылы Ауғанстан елін де болашақта аймақтақтық экономиканың еркін ойыншысы, қатысушысы ретінде қарастыруға күш салып отырмыз. Ауғанстан Орта Азияның экономикасы үшін Үндістан, Пәкістан секілді ірі нарыққа шығатын қақпа десек болады. Осы себепті ондағы қауіпсіздікті қалпына келтіру тек саяси жақтағы ғана емес, әрі экономикалық жақтан да үлкен маңызы бар түйін»,-деді ҚР Сыртқы істер министрінің орынбасары.

Есбол Социалхан