Сооронбай Жээнбеков Нұрсұлтан Назарбаевты Қырғызстанға ресми сапармен келуге шақырды

«Сапар аясында Қазақстан мен Қырғызстанның Жоғарғы мемлекетаралық кеңесін өткізу жоспарланып отыр.  Мен Нұрсұлтан Әбішұлын 2018 жылдың  қыркүйегінде  Орталық Азияның  маржаны- Ыстықкөлде өтетін   Көшпенділер  үшінші әлемдік  ойындардың ашылу салтанатына шақырдым», - деді Қырғызстан басшысы.

С. Жээнбеков айтып өткендей, келесі жылы  Қырғызстан қырғыз жазушысы  Шыңғыс Айтматовтың 90 жылдығын мерекелейді.

«Қазақстан шетте қалмай, мерекелік шараларға белсенді қатысатындығына сенімдімін.  Себебі, қазақстандықтар да жазушының туындыларын сүйіп оқиды», - деді Қырғызстан Президенті.

Келіссөздер қорытындысы бойынша Қазақстан мен Қырғызстан Президенттері Қазақстан Республикасы мен Қырғыз Республикасы арасындағы Қазақстан-Қырғыз мемлекеттік шекарасын шегендеу  туралы шартқа қол қойды.

Ақбота Күзекбай