• Басты
  • Алдағы үш жылда Қазақстандағы уран өндірісі 20 %-ға қысқарады
21 Желтоқсан, 2017 17:11

Алдағы үш жылда Қазақстандағы уран өндірісі 20 %-ға қысқарады

Соңғы жылдарда уран бағасының арзандауы туындап отырғандықтан, елімізде уран өндірісін азайту жалғасты жүргізілмек. Бұл туралы Орталық коммуникациялар қызметінде өткен баспасөз маслихатында «Қазатомөнеркәсіп» ҰАК» АҚ-ның Басқарма Төрағасы Ғалымжан Пірматов мәлім етті.
Алдағы үш жылда Қазақстандағы уран өндірісі 20 %-ға қысқарады

Уран өндіру нарығында Қазақстан әлемдік сұраныстың 40 пайызын қамтамасыз етеді. Ал оның тең жартысы Қазатомөнеркәсіптің еншісінде. Уранды Ресей, Франция, Канада, Қытай және Жапонияның трансұлттық компанияларымен серіктестікте құрылған еншілес және бірлескен кәсіпорындар өндіреді. Қазақстандағы уран өндіру әдісін МАГАТЭ экологиялық ең таза әрі қауіпсіз деп таныған.

«Өкінішке орай, бір фунт уранның бағасы соңғы он жылда 136 доллардан 18 долларға дейін төмендеп кетті. Өнімнің көптігі нарықта қиындықтар тудырды. Соған байланысты осы жылдың басында өндіріс көлемін қысқартуға мәжбүр болдық. Бұл шара да қажетті нәтиже бермегендіктен алдағы үш жылда өндірісті тағы 20 пайызға азайту жөнінде шешім қабылдадық. Алайда бұл қадамымыз компанияның тұтынушылар алдындағы міндеттеріне әсер етпейтінін атап көрсеткім келеді»,-деді Ғалымжан Пірматов.

Еске сала кетейік, биылғы жылы қаңтар айында уран өндірісін 10 пайызға қыстарту туралы шешім қабылданған болатын.

Ғалымжан Пірматовтың айтуынша, ақырғы бес жыл ішінде компания кәсіпорындарында өндірістік жарақат алу деңгейі екі есеге қысқарған.

«Ағымдағы жылдың 9 айында қоршаған ортаны қорғау іс-шараларына 1,2 млрд теңгеден астам қаражат жұмсалды. 2017 жылы 530 өнертабыстық ұсыныс енгізіліп, болжам бойынша олардың экономикалық тиімділігі 1,5 млрд теңгеден асады деп күтілуде»,-дейді компания басшысы.

Есбол Социалхан

 

Барлық жаңалықтар