Батыс Қазақстанда 77 тұрғын үй пайдалануға берілді

Зашаған кентінде бой көтерген 9 қабатты үйде басталған қоныстойға Батыс Қазақстан облысының әкімі Алтай Көлгінов арнайы келіп, тұрғындардың қуанышымен бөлісті.

Облыста 8 бірдей әлеуметтік нысан ашылды. Екі білім беру, 3 мәдениет және 3 спорт нысаны мерекеде қолданысқа берілді.

Айта кету керек, Батыс Қазақстан облысында 95 нысан пайдалануға берілді. Атап айтар болсақ, 337 отбасы жаңа пәтер кілттеріне қол жеткізді. Орал қаласында 180 пәтерлі көпқабатты тұрғын үй пайдалануға берілсе, аудандарда 157 отбасы баспаналы болды.

«Бұл зәулім тұрғын үйлер Елбасымыздың «Нұрлы жер» бағдарламасы аясында салынуда. Өңірдегі тұрғын үй салу жұмыстарын жергілікті құрылыс компаниялары жаңа технологиямен сапалы әрі уақытылы жүргізуде. Ағымдағы жылы «Нұрлы жер» бағдарламасымен облыс орталығында 14 көп қабатты тұрғын үй және сегіз ауданда 188 пәтер салынуда», - деді А.Көлгінов.