Маңғыстауда «Болашақ» шекара бекеті ашылды

18 Желтоқсан, 2017 10:03

Маңғыстауда Тәуелсіздік күні қарсаңында Қазақстан-Түркменстан шекара шебінде ҚР ҰҚК ШҚ Жағалау күзеті өңірлік басқармасы 2018 әскери бөлімінің «Болашақ» шекара бекеті салтанатты түрде ашылды.

«2018 әскери бөлімінің жеке құрамы Қазақстан Республикасының транзиттік аймағы болып табылатын Қазақстан-Түркменстан бағытындағы Мемлекеттік шекараны сеніммен күзетіп келеді. Осыған дейін шекара заставасының күнделікті қызметтік – жауынгерлік іс-әрекеттері жылжымалы модуль типтерінде ұйымдастырылып келген болатын. Енді әскери құрам жаңа бекетте Отан алдындағы парызын орындай алады», - деп облыс әкімдігінен хабарлады.

Ашылу салтанатына арнайы барған облыстық мәслихат хатшысы Серікбай Трұмов Қазақстан шекарашыларының халық пен елдің мүддесіне риясыз қызмет ететіндігіне, әскери антқа және қызметтік парызға адал болатындығына сенім білдірді.

Қазақстан Республикасы Ұлттық қауіпсіздік комитеті Шекара қызметінің шекарашылары Мемлекеттік шекараның қол сұғылмауын, шекара кеңістігіндегі заңдылықты және тиісті тәртіпті орнатуды орындаумен, Қазақстан Республикасының Мемлекеттік шекарасын сенімді қорғау тапсырмасын асқан ерлікпен атқарып келеді.

Шараға қатысушылар шекара қалашығының инфрақұрылымымен, сондай-ақ автокөлік және арнайы техникасымен танысты.