• Басты
  • Жаңалықтар
  • Шетелге шығатын қазақстандық азаматтарға арналып «SmartTravelKZ» мобильдік қосымшасы жасалды

Шетелге шығатын қазақстандық азаматтарға арналып «SmartTravelKZ» мобильдік қосымшасы жасалды

14 Желтоқсан, 2017 17:34
Шетелге шыққан Қазақстан азаматтарына арналып «SmartTravelKZ» мобильдік қосымшасы жасалды. Азаматтар шетелде жүріп көмек қажет етсе осы қосымша арқылы ҚР елшілігінен көмек сұрай алады. Бұл туралы Орталық коммуникациялар қызметінде өткен баспасөз маслихатында ҚР СІМ Консулдық қызмет департаментінің директоры Ардақ Мадиев пен ҚР СІМ Баспасөз қызметінің басшысы Ануар Жайнақов айтып берді.

Спикерлердің айтуынша СІМ жасап шығарған «SmartTravelKZ» тегін мобильдік қосымшаның басты мақсаты шетелдердегі Қазақстан азаматтарының қауіпсіздігін қамтамасыз ету, сондай-ақ жедел түрде қолғабыс беріп, жәрдемдесуді көздейді.

«Мобильдік қосымша аймақтық ерекшеліктеріне қарай, елдер туралы тиімді ақпаратпен, барған елдеріндегі өзін ұстау нормалары, қауіпті жағдайға арналған іс-шаралар, төтенше жағдайлар кезіндегі ескертулер және шетелде жүрген азаматтар үшін басқа да маңызды мәліметтермен қамдайды. Қосымшаның көмегімен пайдаланушылар барған елінде санитарлық-эпидемологиялық және қылмыстық жағдай туралы да деректерді таба алады»,-дейді ҚР СІМ Консулдық қызмет департаментінің директоры Ардақ Мадиев.

Мобильдік қосымша офлайн режимде де жұмыс істейді. Сонымен қатар, шет елдердегі сақтандыру, медициналық қызмет жөнінде кеңестер, төтенше жағдайлардағы әрекеттер, көмекке арналған телефон нөмірлері, қазақстандық көлікпен тасымалдаушылар өкілдерінің байланыс деректері, медициналық және адвокаттық мекемелер бойынша ұсыныс беру сипатындағы ақпараттар да енгізілген. Аталған қосымшаны пайдаланушылардың сол елдердегі Қазақстанның консулымен байланыса алады және онлайн режимде төтенше жағдайлар бойынша консулдық көмек ала алады.

Бұдан бөлек СІМ өкілі еліміз азаматтарын шетелде қорғау және көмек көрсету жұмыстарынан мәлімет берді.

Есбол Социалхан

 

Барлық жаңалықтар