«Даму» Қоры мен Азия Даму Банкі 72 млрд теңге сомасындағы қарыз туралы келісімге қол қойды

13 Желтоқсан, 2017 13:01

«Даму» кәсіпкерлікті дамыту қоры» АҚ мен Азия Даму Банкі Қазақстан Республикасы Үкіметінің мемлекеттік кепілдігімен 72 млрд теңге сомасындағы қарыз туралы келісімге қол қойды. Осыған орай Орталық коммуникациялар қызметінде «Даму» кәсіпкерлікті дамыту қоры» АҚ Басқарма төрағасының орынбасары Дәулет Әбілқайыров пен Қазақстандағы Азия Даму Банкі өкілдігінің директоры Джованни Капаннеллидің қатысуымен баспасөз маслихаты өтті.

«Кепілдік Қазақстан Республикасы Үкіметінің «Азия Даму Банкінің қаражаты есебінен екінші деңгейлі банктер мен микроқаржылық ұйымдар арқылы микро, шағын және орта бизнесті қаржыландыру» жобасы бойынша қаулысының негізінде берілді»,-дейді Дәулет Әбілқайыров.

Спикерлердің айтуынша Қазақстан Республикасы Ұлттық банкімен әріптестіктің арқасында АДБ заемы ұлттық валютада беріледі. Бұл – кәсіпкерлердің валютаға қатысты тәуекелдерін азайтады. Яғни, ақша банкке теңгелей салынып, борышкерлер де қаржыны теңгелей алады.

«Бүгінгі күні Қор «ЦентрКредитБанкі» және «Нұрбанкпен» несие келісіміне қол қойды. Алдағы уақытта «Kassa Nova банкі» мен «Forte Bank» және «KMF» микроқаржы ұйымымен жалпы сомасы 48 млрд теңгеге келісімге қол қойылады»,-деп жеткізді Д. Әбілқайыров.

Спикерлер қаржыландыру талаптарына да тоқталды. Банктер бұл қаражатты экономиканың барлық салаларындағы микро, шағын және орта кәсіпкерлік субъектілеріне айналым қаражатын толтыру, негізгі құралдарды жаңарту секілді істерге жұмсай алады. Сондай-ақ басқа банктен алған несиелерді қайта қаржыландыруға да мүмкіндік беріледі. Қаражат бір борышкердің қолына 1 млрд 80 млн теңгеге дейін, жылына 15% пайыздан аспайтын етіп, 36 айға дейін берілмек.

«Даму» қоры бұған дейін де АДБ дан 2011,2014,2015 жылдары үш кезеңге бөліп, 500 млн АҚШ доллары көлеміндегі заемды мемлекет кепілдігімен алған болатын. Қарыз салалық шектеусіз берілген болатын.

Есбол Социалхан

Барлық жаңалықтар