Базалық сала бойынша экономиканың өсімі 3,9%-ды құрады

«Негізгі капиталға салынған инвестициялардың өсу қарқыны 2016 жылмен салыстырғанда 2,8 есеге жылдамдап, 5,7 процентке өсті.Жылдың басынан бері жылдық инфляцияның деңгейі бекітілген аралықта (6-8%) болды және қарашаның қорытындысы бойынша 7,3 процентті құрады», - деді Т.Сүлейменов.

Министр айтып өткендей,  экономиканы әртараптандыру, Ауылөнеркәсіптік кешенді, кәсіпкерлікті және инфрақұрылымды дамыту, сондай-ақ жұмыспен қамтуды қамтамасыз ету бойынша бағдарламаларды іске асырудың нәтижесінде экономиканың барлық салаларында оң серпін байқалып отыр.

«Нақты секторда 6 базалық саланың ішінде ең жоғары өсу өнеркәсіпте 7,3% деңгейінде, көлікте - 4,8% және байланыста - 3,2% байқалып отыр.Кен өндіру өнеркәсібінде мұнай өндірудің  (10,9%-ға) және табиғи газдың (10,0%-ға) қос мәнді санға өсуі арқасында9,6%-ға өсу байқалып отыр», - деді министр.

Сондай-ақ,  өңдеу өнеркәсібіндегі өсу 5,2%-ды құрады. Фармацевтикалық өнімдер (өсу 42,1%-ға), жиһаз өндіру (9,8%-ға),  жеңіл (8,1%-ға) және металлургия өнеркәсіптері(6,0%-ға), мұнайды қайта өңдеу өнімдері(5,5%-ға), тамақ (4,3%-ға) және сусындар (4,1%-ға),сондай-ақ машина жасау (5,9%-ға) өңдеудің өсуін қамтамасыз еткен драйверлер болды.

«Ауыл шаруашылығында өсу а.ж. қаңтар-қыркүйектегі 1,9%-дан 11 айдың қорытындылары бойынша  2,3%-ға жылдамдады. Мал шаруашылығындағы өнім шығарылымының өсуі (3,6%) өсімдік шаруашылығындағы өсуден (1,4%) 2,6 есеге озық болып отыр», - деді Т.Сүлейменов.

Министр айтқандай, құрылыс саласының 2016 жылғы жоғары өсуінің аясында ағымдағы жылдың басынан бері әркелкі өсу байқалып отыр, ол биылғы жылғы  қаңтар-қарашада 0,3%-ды құрады.

«Экономиканың нақты секторындағы іскерлік белсенділік сабақтас салалар үшін сұраныс құра отырып қызмет көрсету саласының өсуін ынталандырды», - деді ол,

Ақбота Күзекбай