Ақтөбе облысында жаңа газ тарату станциясы іске қосылды

АГТС-30 іске қосуға арналған салтанатты шараға облыс әкімі Бердібек Сапарбаев қатысты.

«Мемлекет басшысының тапсырмасымен өңірде халықтың әл-ауқатын жақсартуға байланысты ауқымды жұмыстар жүргізілуде. Қол жеткізген келісімдер нәтижесінде «Қаз Транс ГазАймақ»АҚ  өңірді газдандыру үшін 20 млрд. теңге бөлді. Қабылданған шаралар нәтижесінде Ақтөбе, Алға және Қандыағаш қалаларында АГТС тұрғызылып, 10 елді мекен газбен қамтамасыз етілді. Осы жұмыстардың арқасында облысты газбен қамту 87% құрады»,-деп атап өтті Б.Сапарбаев.

Аталмыш жоба облыс әкімдігі мен «ҚазМұнайГаз» ҰК» АҚ арасындағы қол қойылған меморандум нәтижесінде жүзеге асырылды. Жаңа АГТС-30 Алға қаласындағы осы уақытқа дейін жұмыс істеп тұрған станция жұмысын жеңілдетіп, қуаттылығын арттыруға және Алға ауданындағы тұрғын үйлер мен әлеуметтік, өнеркәсіп нысандарына көгілдір отынның үздіксіз берілуін қамтамасыз етеді. Станцияның қуаттылығы қазіргі таңда жұмыс істеп тұрған нысандарды табиғи газбен қамтып қана қоймай, болашақта да газ таратуға жеткілікті.

 «ҚазТрансГаз Аймақ» АҚ Ақтөбе өндірістік филиалының директоры Бақтияр Ізбасаровтың мәліметінше, жалпы, Ақтөбе облысында елді мекендерді газдандыру және газ тарату желілерін жаңғырту аясында  600 мың метр құбыр пайдалануға беріліп,  700 зауыт пен өнеркәсіптік нысандары және 5,5 мың тұтынушы көгілдір отынға қол жеткізді.