Ақтөбе облысында көп балалы отбасылар пәтерге ие болды (ФОТО)

12 Желтоқсан, 2017 10:14

Ақтөбе облысының Алға қаласында Қазақстан Тәуелсіздігінің 26 жылдығын мерекелеу қарсаңында сегіз пәтерлі жалдамалы коммуналдық тұрғын үй пайдалануға берілді. Облыс әкімі Бердібек Сапарбаев жаңа қоныстанушыларға, оның ішінде, көпбалалы отбасылар мен бюджеттік сала қызметкерлеріне арналған пәтер кілттерін табыс етті, деп хабарлады облыс әкімдігінің баспасөз қызметі.

«Мемлекет басшысы халықтың тұрғын үй мәселесінің шешіміне ерекше көңіл бөледі. Осы тапсырманы орындау үшін облыста «Нұрлы жер» бағдарламасы ауқымды түрде жүзеге асырылуда, тек биылғы жылы ғана мыңнан астам ақтөбелік отбасы қоныс тойын тойлайды. Биыл аз дегенде 700 мың шаршы метр тұрғын үй пайдалануға беріледі», - деді Б.Сапарбаев.

Көпбалалы ана Аққайша Құлмағамбетоважаңадан қоныстанушылардың атынан ел басшылығына әлеуметтік жағынан аз қамтылған отбасылардың тұрғын үй мәселесін шешуге көмектескендері үшіналғыс айтты.

Жақын арада Алға қаласында 60 пәтерлі коммуналдық жалдамалы екі жаңа тұрғын үй пайдалануға беріледі. Бердібек Сапарбаев олардың құрылысы барысымен танысты. Оларды пайдалануға беру 120 алғалық отбасылардың тұрғын үй мәселесін шешуге мүмкіндік береді.

Сондай-ақ, облыс әкімі құны 1,7 млрд теңге тұратын мектеп-интернаттың құрылысын тексерді. Жаңа нысан келесі жылдың жаз айларында пайдалануға беріледі. 600 оқушыға арналған мектеп ғимараты спорт және акт залдары, асхана, медициналық пункт, салалық сыныптар мен 100 орындық мектеп-интернат орналасқан жеті блоктан тұрады.

Барлық жаңалықтар