Б.Сағынтаев Түрік және қазақстандық кәсіпкерлер қауымдастығы өкілдерімен кездесу өткізді

7 Желтоқсан, 2017 20:51

Үкімет үйінде ҚР Премьер-Министрі Бақытжан Сағынтаев Қауымдастықтың басқарма кеңесінің төрағасы, Eksen Group компаниясының иесі Фырат Девелиоғлының басшылық етуімен Түрік және қазақстандық кәсіпкерлер қауымдастығының өкілдерімен кездесу өткізді, деп хабарлады primeminister.kz.

Кездесулер барысында екі елдің бизнес-құрылымдары арасындағы өзара тиімді ынтымақтастықты нығайту және Қазақстанда жаңа бірлескен инвестициялық жобаларды жүзеге асыру мәселелері талқыланды.

Түркия Қазақстанның басымдықты инвестициялық серіктесі ретіндегі орнын сақтап отыр.

ҚР Ұлттық Банкінің деректері бойынша, 2005 жылдан бастап 2017 жылдың сәуір айына дейін Түркиядан Қазақстанға тікелей инвестициялардың жалпы ағыны $2,1 млрд құрады.

2017 жылдың қаңтар-маусым айларында екі ел арасындағы тауар айналымы $925,1 млн-ды, оның ішінде экспорт — $563,3 млн және импорт — $361,8 млн-ды құрады.

2015 жылы «Жаңа синергия» Бірлескен экономикалық бағдарламасының 2012–2015 жылдарға арналған іс-шаралар жоспары әзірленді. Жоспарға сәйкес, түрік компанияларының ынтымақтастықтың инвестициялық-экономикалық сегментіндегі қызметі, сондай-ақ ҚР-да Қазақстан – Түрік индустриалды аймақтарын құру жөніндегі жұмыстар жандандырылды.

Түрік және қазақстандық кәсіпкерлер қауымдастығы 2016 жылдың басында, Қазақстан Республикасы Тәуелсіздігінің және Қазақстан мен Түркия арасындағы дипломатиялық қарым-қатынастың орнауының 25 жылдығына орай құрылды.

Түрік және қазақстандық кәсіпкерлер қауымдастығы бизнес-қауымдастық бола отырып, Қазақстан мен Түркия арасындағы сауда, өнеркәсіптік және экономикалық байланыстарды одан әрі нығайтуға, түрік және қазақстандық кәсіпкерлер арасындағы іскерлік байланыстар мен ынтымақтастықты нығайтуға ықпал етеді, сондай-ақ, кәсіпкерлер мен компанияларға өздерінің қызмет салаларына қатысты мәселелер бойынша кеңес береді және екі ел арасындағы әлеуметтік-мәдени байланыстарды күшейтеді.

Барлық жаңалықтар