«Жол картасы» Қазақстанға қарағанда, Қырғызстан үшін тиімдірек — сарапшы

«Жол картасы Қазақстанға қарағанда, Қырғызстан тарапы үшін ұтымды болмақ. Қырғызстан экономикасы 90 жж Қазақстанның экономикасына ұқсайтынын атап өту керек. Әртүрлі бағалау бойынша Қырғызстанда 20%-дан 50 %-ға дейін көлеңкелі экономиканың үлкен секторы бар. Қабылданған «Жол картасы» экономиканың көлеңкелі секторының жарыққа шығуына, мемлекеттің салықтық базасын ұлғайтуға жағдай туғызбақ», — деп мәлімдеді Жақсылық Сәбитов.

Естеріңізге сала кетсек, Қазақстан және Қырғызстан үкіметтері бүгін Астанада келіссөз өткізіп, екіжақты экономикалық әріптестік мәселелері бойынша Жол картасына қол қойды. Көрші ел делегациясымен келіссөз Қазақстан Президенті Нұрсұлтан Назарбаевтың Минскіде Қырғызстанның жаңа Президенті Сооронбай Жээнбековпен кездескеннен кейін үкіметке берген тапсырмасы бойынша өткен.

Аталған Жол картасында шекаралық, көлік, фитосанитарлық, ветеринарлық бақылау, кеден және салық тәрізді екіжақты әріптестіктің маңызды мәселелерін кешенді түрде шешуді көздейтін 50 шара қамтылған. Құжатқа жедел сипаттағы 16, 5 қысқа мерзімді және 29 жүйелі шара енгізілген.