Біз стартапымызды университет жертөлесінен бастаған болатынбыз – Санжар Мырзағалым

1 Желтоқсан, 2017 19:27

Егер біз электр энергиясын тиімді пайдалансақ, 5 млрд киловатт-сағ электр энергиясы мен 70 млрд теңгені үнемдейтін едік, деді IT-маман, стартапшы Санжар Мырзағалым ҚР Президенті мен «100 жаңа есім» жеңімпаздарының кездесу барысында.

«Біздің стартап университеті кезінен басталды. Сол кезде электроника мен бағдарламаларды сүйетін балалар жиналып, әртүрлі байқауларға қатысатынбыз. Біздің жолымыз Стив Джобстың жолына ұқсайды. Егер ол өз стартапын гараждан бастаса, біз университет жертөлесінен бастадық», - деді Санжар Мырзағалым.

Ол айтып өткендей, үш жыл бұрын олар «Eco Stocker» деп аталатын электрлі энергия үнемдейтін интеллектуалды жүйені ойлап тапқан.

«Аталмыш жүйе Нью-Йоркте өткен жылы ЭКСПО-2017 аясында БҰҰ штаб пәтерінде таныстырылды. Қазақстанда электр энергиясын тиімді пайдалансақ, 5 млрд киловатт-сағ электр энергиясы мен 70 млрд теңгені үнемдейтін едік», - деді ол Елбасына.

Сингапурдағы байқауда Санжар Мырзағалымның командасы үздік ондыққа енді.

Ақбота Күзекбай