2014 жылы Қазақстанның батыс және шығыс өңірлері цемент импортынан толықтай бас тартуы мүмкін
15 Қаңтар, 2014 11:20
Жылына 1 млн тонна өнім беретін Маңғыстау облысындағы «Каспийцемент» АҚ мен жылына 2 млн тонна өнім беретін Ақмола облысындағы «Көкшецемент» АҚ өндірісінің іске қосылуы импорттан толықтай арылып, экспорт көлемін арттырып, маусымаралық мезгілдерде елдің шығысы мен батысындағы баға қымбаттауының алдын алуға мүмкіндік бермек, деп хабарлайды ҚР Индустрия және жаңа технологиялар министрлігінің баспасөз қызметі.
«ҚР ИЖТМ Өнеркәсіп комитетінің мәліметінше, 2013 жылдың 10 айындағы көрсеткіш бойынша Қазақстанның ішкі нарығындағы отандық цемент өнімінің үлес салмағы 80% құрайды. Осы уақытта 6,2 млн тонна шығарылса, сырттан әкелінген цемент көлемі 1,6 млн тонна», - делінген хабарламада.
Қазіргі таңда жалпы саны 10 зауыт цемент өндірумен айнаысады, олардың жалпы қуаты жылына 10,74 млн тонна өнім беруге жетеді.
Елдің батыс өңіріндегі «КаспийЦемент» ЖШС 2013 жылдың соңында жылына 1 млн тонна өнім беретіндей қуаттылыққа жетті.
Ал 2014 жылы Ақмола облысында «Көкшецемент» ЖШС зауытын іске қосу жоспарланып отыр. Оның қуаты жылына 2 млн тоннаны құрамақ.
