Жаңа толқынның композиттік және полимерлі материалдар өніміне басымдылық беріледі – Ә.Исекешев

«Вице-премьердің айтуынша, аталмыш сала Мемлекет басшысы тарапынан ҮИИД мемлекеттік бағдарламасының басым бағыттарының бірі ретінде қолға алынып отыр және құрылыс материалдары бойынша отандық нарықты ішкі өнімнің 80 пайызына дейінгі үлес салмағымен қамту туралы тапсырма беріліп, сонымен қатар еңбек өнімділігін 1,9 есеге дейін арттыру міндеттемесі жүктелді», - делінген хабарламада.

Министрліктің мәліметінше, ҮИИД мемлекеттік бағдарламасын қабылдаған уақыттан бергі қолданылған шаралардың нәтижесінде бірқатар шетелдік инвесторларды тартып, жаңа жұмыс орындарын ашып, жаңа заманауи технологияларды енгізіп, өндіріс көлемін арттырып отырмыз.

Сонымен өндіріс 2009 жылғы 175,2 млрд. теңге көрсеткішінен 2013 жылдың 11 айында 363,3 млрд теңгеге артты.

Индустрияландыру картасы аясында 120 жоба іске қосылып, 1 млрд доллар көлемінде инвестиция құйылды.

Аталмыш жобалардың арқасында құрылыс материалдары, соның ішінде цемент өндірісіне қатысты бірқатар мәселелердің түйіні тарқатылды. Отандық цемент өндірісі көлемі артып, жылу өткізбейтін труба, пластмасса, гипсокартон, және құрғақ құрылыс материалдары өнімдері көптеп өндіріле бастады. Ішкі нарық отандық өнімдермен 100 пайыз қамтылды. Нақтырақ айтар болсақ олар бетон, бетон бұйымдары.

Ішкі нарықтағы отандық құрылыс материалдары өнімі 2009 жылғы көрсеткіштен қарағанда 55,2 пайыздан 2013 жылы 71 пайызға артты.

Қазіргі таңда салаларда шамамен 1200 кәсіпкерлік жұмыс істейді, ондағы жұмысшылар саны 36 мың адам.