Ақтөбеде жеке тұрғын үй құрылысы үшін 5,2 мыңнан аса жер телімі берілді
16 Қараша, 2017 18:51
Биылғы жылдың қорытындысы бойынша кезекте тұрғандарға Ақтөбе қаласынан жеке тұрғын үй құрылысы үшін 10 мың жер телімін беру жоспарда бар. Бұл туралы «Ақтөбе ақпарат» орталығында өткен баспасөз мәслихатында Ақтөбе қаласының әкімі Ілияс Испанов мәлімдеді.
«Бүгінде кезек бойынша Бауырластар-3, Думан, Жаңақоныс-2 тұрғын алаптарынан 5 273 жер телімі бөлінді. Жер телімдерін бөлу жұмысы жыл соңына дейін жүргізілмек. 2018, 2019, 2020 жылдары жеке тұрғын үй құрылысы үшін 28 мың жер телімін бөлу жоспарланып отыр»,-деп жеткізді қала басшысы.
Жеке тұрғын үй құрылысы үшін анықталған тұрғын үй алаптарын инженерлік инфрақұрылым нысандарымен қамтамасыз ету жұмыстары жалғасуда. Он айдың қорытындысы бойынша су-газ-электрмен жабдықтау және кәріз желілерінің 16 нысаны пайдалануға берілді, төрт ағын стансасының құрылысын аяқтау жоспарланған.
