Павлодар облысында құрғақ қымыз шығарылады
13 Қараша, 2017 11:52
Павлодар облысында құрғақ қымыз өндіріле бастады. Ұнтақ түріндегі шыға бастаған қазақтың ұлттық сусыны сынақтан өтіп үлгерді, деп хабарлады облыс әкімдігінің баспасөз қызметі.
«Лебяжі ауданының «Алтай» шаруа қожалығы павлодарлық «Fresh Milk» ЖШС-мен бірлесіп бие сүтін ұнтаққа айналдыратын жабдық сатып алған. Лебяжілік қымыздан жасалған бірегей ұнтақты Қазақстан және шетел нарығына шығару жоспарланып отыр. Күніне жиырма келіге жуық ұнтақ шығарылады», - делінген хабарламада.
Қыркүйек айында Гонконг елінде әлем кәсіпкерлері арасында үлкен байқау өткен болатын. Онда ұнтақ түріндегі құрғақ қымыз экологиялық таза өнім санатында бірінші орынға ие болды.
