Тамақ өнімдерін сауда нысандарына қоюдың санитарлық талаптары жеңілдетілді

10 Қараша, 2017 20:31

Орталық коммуникациялар қызметінде өткен баспасөз конференциясында ҚР ДСМ Қоғамдық денсаулық сақтау комитетінің төрағасы – Қазақстан Республикасының Бас мемлекеттік санитариялық дәрігері Жандарбек Бекшин тамақ өнімдерінің көтерме және бөлшек саудасы объектілеріне қойылатын санитариялық қағидалар талаптарын қайта қарау бойынша жүргізілген жұмыс туралы айтып өтті.

Биыл 9 қазанда жаңартылған «Тамақ өнімдерінің көтерме және бөлшек саудасы объектілеріне қойылатын санитарлық-эпидемиологиялық талаптар» санитарлық қағидалары күшіне енді.

«Енгізілген түзетулер әкімшілік тосқауылдар мен артық талаптарды алып тастауға қатысты болды. Мәселен, сандэпидқортындының болуына қойылатын талаптар алынып тасталды, себебі барлық сауда объектілері хабарлама тәртібі бойынша жүзеге асырылатын эпидмаңыздылығы болмашы топқа ауыстырылды», -дейді спикер.

Шамадан тыс нақтылауды талап ететін, өндіріс пен қызмет көрсету процестерін төмендететін тармақтар қайта қаралған. Сондай-ақ мемлекет тарапынан көрсетілетін қызмет регламенттері мен стандарттарында көзделмеген артық талаптар, басқа нормативтік құқықтық актілерде қайталанатын талаптар алынып тасталған.

«Қабылданып жатқан шаралар бизнес, әсіресе ШОБ субъектілері үшін жағдайды жақсартуға ықпал етіп, тамақ өнімдерінің сапасы мен қауіпсіздігіне қажетті жағдайлар жасауды негіз етті»,-дейді Жандарбек Бекшин.

Есбол Социалхан

Барлық жаңалықтар