Ресейден 90 мың тонна дизель отыны импортталады

9 Қараша, 2017 18:44

«ҚазМұнайГаз Өнімдері» ЖШС Қазақстан Республикасы Үкіметінің, сондай-ақ «ҚазМұнайГаз» ұлттық компаниясының тапсырмаларына сәйкес қараша айында Ресей Федерациясынан 90 мың тонна дизель отынын импорттайды. Бұл туралы Орталық коммуникациялар қызметінде болған баспасөз конференция ҚазМұнайГаз Өнімдері» ЖШС Бас директоры Қуандық Құлмырзин мәлім етті.

«Біз өзіміздің әлеуметтік жауапкершілігімізді сезінеміз және ел басшылығы мен ұлттық компания қойған барлық міндеттемелерді орындаймыз», - деп атап өтті Қуандық Құлмырзин.

Импорт етілген дизельдің алғашқы 9 мың тоннасы тиеп-жөнелтілген, қазіргі уақытта жанармай жолда келе жатыр. Қалған тиелім жақын уақытта жүргізілмек. Солтүстік, батыс және орталық өңірлерде күннің суыта бастауына байланысты жанармай алдымен осы өңірлерге жіберілетін болады.

Ал оңтүстік өңірлер қазірше «PetroKazakhstan Oil Products» Шымкент МӨЗ шығарған дизель отынымен қамтамасыз етіледі.

Павлодар мұнай химия зауытынан басқа, қазақстандық мұнай өңдеу зауыттары максималды жүктемемен штаттық режимде жұмыс істеп тұр. Зауыттарда өндірілетін барлық жанармай ішкі нарықта сатылады.

«ҚазМұнайГаз» ЖМҚС желісі маусымаралық дизель отынының бағасын оны өндірген мемлекетіне қарамастан, литріне 155-160 теңге деңгейінде ұстап тұрады.

Есбол Социалхан