«Мектебіме тағзым» акциясы 2017-2018 оқу жылының соңына дейін жалғасады

8 Қараша, 2017 12:14

«Мектебіме тағзым» акциясы жарты жылда Ертіс маңындағы 205 мектепті қамтыды, деп хабарлады Павлодар облысы әкімдігі.

Аймақтың түрлі жастағы және мамандықтағы табысты азаматтары өздерінің білім алған мектептеріне қажетті заттарды 111 млн теңгеге алуға көмектесті. Алғаш болып акцияға «Нұр Отан» партиясының облыстық филиалы қолдау көрсетті. Жалпы, бар жоғы жарты жылдың ішінде павлодардық кәсіпорындар мен мемлекеттік қызметте жұмыс істейтін, сонымен қатар шетелде тұратын 532 азамат өңірдегі 205 оқу ордасына қажетті заттарды алуға көмектесті. Әр қатысушы өзінің білім алған мектебіне ерекше сый тарту етті. Бірі мектебінде шахмат немесе компьютер мектебін ашса, кейбіреулер музыка, химия, биология,физика, тарих немесе робототехника сынды пәндер бойынша арнайы сыныпты жасақтауға көмектесті. Спорт залды, асхана мен мектептің кіреберісін, шатыры мен терезесін жөндеуден өткізді.

Осы жылы «Мектебіме тағзым» акциясы ең табысты игі істердің бірі болып танылды. Сондықтан да оны өткізу мерзімі 2017-2018 оқу жылының соңына дейін ұзартылды, деп жазады pavlodarnews.kz.

Естеріңізге сала кетейік, «Мектебіме тағзым» жобасы павлодарлық мектеп түлектерінің бастамасымен 2017 жылдың 25 мамырында басталған болатын.